GOVERNU APLIKA TAXA BA KARETA NO MOTORIZADA

Governu liu husi Ministériu Administrasaun Estatal,  aban Kuarta (17/07/2017) aplika ona taxa ba kareta  no motorizada ne´ebé mak tama ba iha fatin estasionamentu Merkadu Taibesi.

Tanba  ne´e funsionariu Jestaun  merkadu Taibesi, Tersa (16/08/2017)  halo  limpeza  iha fatin refere  ho objetivu ba lansamentu ninian. Ho limpeza ne´e kareta tula pasajeiru sira tenki para fali  iha kampo laran area Temporal nian. Sekretáriu  Administrador Munísipiu  Díli, José  Filipe  Ximenes Smith, hateten, kareta ho motorizada  ne´ebé mak para  iha  fatin estasionamentu Taibesi sei selu sentavu rua nulu resin lima (kuarter-red)  oras ida,  ne´ebé sistema ne’e sei aplika ba ema hotu. “Maibe  kareta truck sira ami  aplika taxa 50  sentavus kada oras ida,“hateten José  Filipe  Ximenes Smith. Maske  estasionamentu iha ona, maibe  Governu la prepara uma ba pasajeiru sira hodi hein kareta. Nune´e  mós iha merkadu Taibesi, komunidade sira laiha konsiensia hodi soe foer arbiru, maske Governu prepara ona fatin ba lixu nian. Entretantu fatin estasionamentu ba kareta no motorizada iha merkadu Taibesi halo  husi  kompañia  Nimina Limitada iha loron 23 Dezembru, tinan 2016 no hetan inagurasaun husi Ministru Administrasaun Estatal, Dionísio Babo.avi