Telkomcel sei instala fiber optic husi Atambua

Kompañia operador telekomunikasaun husi Indonezia, Telekomcel iha ona planu atu halo instalasaun fiber optic (serat optik) ne’ebe sei dada husi Atambua, Timor Osidental, mai Timor Leste.

“Ami hakarak aumenta  kapasitasaun iha Timor Leste tanba investimentu iha ne’e barak mak  konfiansa. Maske  ita hatene ho situasaun aktual iha politika maibe ha’u fiar Telin sei hakarak investe nafatin iha TL,”  hateten CEO Telkomcel ,Yogi Rizkian Bahar ba jornalista sira hafoin inkontru ho Primeiru Ministru (PM), Mari Alkatiri iha Palacio do Governo, Tersa (16/1/2018).

Telkomcel halo ona komunikasaun ho Governu Timor Leste, liu-liu ho Autoridade Nasional das komunikasoens (ANC) atu bele fo lisensa lalais hodi nune’e bele instala ona fiu fiber optic husi Atambua mai iha Timor Leste.

 “Ami mak kompañia ba dahuluk no sei nafatin hakarak atu investe iha  TL. Espera katak lisesensa ami bele hetan lalais,” hateten Yogi Rizkian Bahar.

Durante ne’e, operador telekomunikasaun sira ne’ebe eziste iha Timor Leste uza deit mak satelite tamba ne’e fo implikasaun boot ba kustu internet iha Timor Leste ne’ebe karun tebes.

“Se ami hodi fiber optic mai Timor Leste maka bele garantia katak presu internet sei baratu liu tan,” esplika Yogi Rizkian Bahar. ety