India sei ajuda dezenvolve ekonomia TL

Embaixador India ba Timor Leste, Pradeet Kumar Rawat, promete ba Primeiru Ministru, Taur Matan Ruak katak, India sei ajuda  Timor Leste hodi dezenvolve setór importante sira hanesan ekonomia, saúde, edukasaun no rekursu umanu.

“Ha’u foin remata husi enkontru ida ne’ebé diak tebes ho Primeiru Ministru, ami ko’alia kona-ba Governu ninia prioridade sira atu dezenvolve Timor-Leste ninia ekonomia, dezenvolve rekursu humanu liu husi fornesimentu abilidade foun sira, no oinsa atu kria empregu barak liután,” informa Pradeet Kumar Rawat ba jornalista sira hafoin hasoru malu ho PM Taur Matan Ruak iha Palácio Governu, Kuarta (21/08).

Pradeet Kumar dehan, India senti katak, setór sira ne’ebé mensiona ne’e, India  bele sai parseiru diak ida ba Timor-Leste.

“Ami mós ko’alia kona-ba oinsa ita bele servisu hamutuk iha setór edukasaun, oinsa ami bele kontribui ba setór saúde, nomós oinsa ita bele servisu hamutuk iha setór infra-estrutura,” relata Pradeet Kumar.

Kumar dehan, iha enkontru ho PM Taur ne’e, nia hetan akompañamentu husi delegasaun kompañia lubuk husi Bali hodi vizita Timor Leste.

“Sira mai Timor-Leste husi Bali, balun husi kompañia sira ne’e servisu tiha ona iha Indonézia. Sira mós servisu ona iha nasaun barak seluk iha rejiaun ida ne’e. Balun husi sira iha servisu iha nasaun haat nulu resin no inkluindu iha grupu kompãnia sira ne’ebé boot liu iha Azía,” relata Pradeet Kumar.

India  espera katak, nu’udar rezultadu husi sira nia vzita ne’e, sei bele hetan kooperasaun ida ho benefisiu mutuá no projetu konkretu balun.

“Área ida ne’ebé ita bele haree rezultadu iha tempu badak mak setór saúde,” tenik Kumar.cos

Leave a Reply

Your email address will not be published. Required fields are marked *