Jeremiah Chan: Pelican Paradise seidauk iha akordu espesiál ho Governu

Diretor Ezekutivu Pelican Paradise, Jeremiah Chan, informa, ekipa investimentu ba projetu Pelican Paradise, to’o oras ne’e  seidauk hahú konstrusaun ba  projetu ne’e,  tanba seidauk iha akordu espesiál ho Governu.

“Ami husi Pelican Paradise, ami-nia enkontru ho Prezidenti Repúblika  Francisco Guterres ‘Lu Olo’, hato’o de’it informasaun kona-ba prosesu investimentu  ba projetu ne’e, investimentu ne’ebé ami halo mak konstrusaun ba Hotel Fitun Lima, Restaurante no seluk tan iha Tasi Tolu”,dehan Diretor Ezekutivu Pelican Paradise ne’e, ba Jornalista iha Palásiu Prezidensial Nicolau Lobato Bairo Pite, Díli, Sesta (19/10/2018).

Jeremiah hatutan, Prezidenti Repúblika enkoraja sira tamba investimentu ne’e di’ak,  nune’e husu ekipa projetu ne’e atu servisu di’ak ho Governu Timor-Leste, la’o tuir regra no lei.

“Atu halo konstrusaun Hotel, ami presiza tinan  tolu de’it, maibe hahú konstrusaun ne’e mak seidauk, tamba tenki iha akordu espesiál ho Governu Timor-Leste,  no tenki hein iha Eletrisidade, Be’e, no Governu mos tenki halo diskusaun barak kona-ba oinsa atu hahú konstrusaun refere”,realsa Jeremiah.

Iha fatin hanesan, Aracanjo da Silva, nu’udar Diretor  Ezekutivu Trade Invest Timor Leste, subliña, investimentu ne’e nia esbosu kompleta ona, maibe presiza aprezenta ba Konsellu Ministru, liu husi Ministériu  ne’ebé tutela ba Trade Invest Timor-Leste.

“Ministru Koredenador Asuntu Ekonómiku Agio Pereira,  presiza aprezenta atu nune’e ministru sira kolektivamente konkorda hotu, husi aspetu oin-oin, hanesan aspetu ambiental, traballu, imigrasaun, sosiedade komersiais no seluk tan, tanba tenki aplika lei mak bele aprova. Akordu espesiál ne’e presiza tempu naruk oituan,  para asentua pontu lubuk ida para investidor sira mos konkorda, ita-nia governu aseita, atu tau iha konsiderasaun ba aspetu sosiu ekonómiku no ambiental, para labele ikus mai prejudika fali ita-nia populasaun sira”,akresenta Arcanjo.

Diretor ne’e esplika liu tan, agora ekipa ba projetu Pelican Paradise seidauk bele halo buat ruma, tamba presiza halo akordu  espesiál ho governu.

“Prosesu entrada investimentu ne’e hahú kedas iha tinan ne’e, no prosesu ne’e naruk tamba presiza konsulta lei barak, tanba investimentu ne’e bo’ot tebes, fazeadamente sira sei investe porvolta millaun US$700  ba projetu ne’ebé lokaliza  iha Tasi Tolu ne’e”,hatuan Arcanjo.Oly

Leave a Reply

Your email address will not be published. Required fields are marked *