PR Lú Olo: Setor privadu importante ba nasaun

Preizdenti Repúblika (PR), Francisco  Guterres ‘Lú Olo’, hatete, setor privadu nia papel importante tebes ba dezenvolvimentu ekonomia nasaun nian, tamba Estadu nunka la’o mesak hodi haburas atividade ekonomia.

“Ho onra bo’ot mak ha’u simu konvite, tamba rekoñese importansia husi setór privadu, mak ha’u deside atu hakat mai iha fatin ida ne’e, hodi partisipa ho laran haksolok iha sesaun abertura ida ne’e”,dehan Lú Olo iha nia diskursu ba kongresista sira iha kongresu datoluk Kámara Komersiu Industria Timor-Leste (CCITL-Sigla Portugés), Kinta (11-10-2018), iha Hotel Novo Turismo, Díli.

Nia afirma, tema  ne’ebé CCITL hili ba kongresu ne’e atual tebes, ba setor privadu mais kriativu, produtivu no sustentavel.

“Ha’u fiar katak, kongresu datoluk ida ne’e, mai husi  vontade ida atu hametin ita bo’ot sira-nia kapasidade organizasaun no kapasitasaun hodi hakat liu dezafiu sira ne’ebé iha oin”,akresenta Lu Olo.

PR Lú Olo realsa tan, ema hotu rekoñese  setor privadu nia papel importante tebes ba dezenvolvimentu ekonomia nasaun.

“Estadu la bele kaer monopoliu ka la bele la’o mesak hodi haburas atividade ekonomia nasaun nian, ho liafuan seluk katak, ekonomia nasaun ida nian labele dinamiza bainhira Estadu mesak mak kaer kompetensia tomak”,subliña Lu Olo.Oly