MOP sei muda EDTL ba empreza públika

Ministéiru Obras  Públikas (MOP) aprezenta proposta iha reuniaun  Konsellu Ministru, atu muda Instituisaun Públiku Eletrisidade Timor-Leste (EDTL) ba Empreza Públika. Razaun Ministeriu Obras Publika hakarak muda EDTL ba empreza publika, tamba  Governu hakarak EDTL bele presta servisu ne’ebe efisiente no mós hadia sistema jestaun iha EDTL.

“Konsellu Ministru rona aprezentasaun ida husi Asia Development Bank (ADB) hamutuk ho Ministériu Obras Públikas (MOP), konaba planu kooperasaun ho EDTL, planu ne’e ho objetivu atu hadia EDTL ho hanoin ba tempu naruk atu halo EDTL nakfilak ba empreza públika ida para bele presta servisu ne’ebe efisiente liu ba ita nia populasaun no bele hadia sistema jestaun institusional EDTL ninia rasik”, hatete Ministru Reforma Legislativa no Assuntus Parlamentares, Fidelis Manuel Leite Magalhães, ba Jornalista sira, Kuarta (16/1/2019), iha Palásiu Governu.

Governante ne’e dehan, atu realiza mudansa refere   Ministeriu Obras Publikas sei halo koperasaun ho Banku Dezenvolvimentu Aziatiku (ADB), tuir planu iha tempu badak sei kria akordu ida hodi realiza koperasaun entre parte rua.

“Ho aprezentasaun ne’e Konsellu Ministru apresia no husu Ministru Obras Publikas atu haree detallu iha kooperasaun ne’e hamutuk ho ADB para depois to’o iha akordu ida entedementu entre Governu Timor-Leste ho ADB para depois implementa”, termina Fidelis Magalhães.tos