PELICAN PARADISE seidauk iha akordu formal ho governu

Empreza PELICAN PARADISE to’o agora seidauk halo investimentu, tanba seidauk iha akordu formal ho Governu Timor-Leste.

Asuntu ne’e deklara husi nain ba empreza PELICAN PARADISE,  Edward Ong, hafaoin ho nia akipia hala’o sorumutu ho Prezidente Parlamentu Nasionál, Arão Noe  de Jesus Amaral, iha parlamentu nasional, Kuarta (15/05/2019).

Edward  hatete, empreza  preparadu ona atu halo investimentu iha area hotelaria no seluk tan bainhira hetan ona akordu husi governu.

Tuir Edward, investimentu PELICAN PARADISE sei kontribui dezenvolvementu no hamenus númeru dezempregu iha Timor-Leste.

“Husi ami nia parte, preparasaun hotu ona bele komesa servisu ka konstrusaun maibe sei hein akordu ida ne’e, e vaga servisu ba ema sei fo servisu ba ema rihun sanulu resin rua (12.000) kompostu husi nivel diretór to’o iha kraik,” hateten Nain Ba Empreza PELICAN PARADISE, Edward Ong.

Prezidente parlamentu nasionál, Arão Noe, ho esperansa governu bele halo akordu formal ida ho empreza refere nune’e bele hahu ona investimentu hodi fo servisu ba Timor oan.

“Mudansa de governu ida ba ida, sira la to’o ba asina akordu ida para sira bele hahu servisu, tanba ne’e mak sira kontinua hein hela, e oinsa governu bele aselera prosesu ne’e, nune’e sira bele hahu ona programa atu harí hotel, e sira nia programa lubuk ida, sei kuada ai iha foho leten, halo kampu golf, sei halo hospital ida, sei halo terminal ida iha tasi tolu no sei hadia area tasi tolu liliu fatin historiku,” hateten Arão Noe.

Maske empreza halo ona esforsu oi-oin dezde  quarto governu maibe formalmente to’o agora ladauk iha akordu ruma husi Governu. Ito