Governu sei prepara millaun USD 20 ba estrada rural

Governu sei prepara millaun USD 20 iha Orsamentu Jeral Estadu (OJE) tinan 2020 atu konstroi estrada rural  iha Munisípiu hotu.

Diretur  Jeral Ministériu Obras Publikas,  Rui Hernani, hateten, Governu planeia ona  hodi fó prioridade ba estrada rural iha teritóriu timor laran tomak, tanba realidade hatudu katak,  pursentu 75  mak populasaun sira hela iha área rural, maibé estrada seidauk di’ak, no balun estrada seidauk iha.

“Tuir planu  tinan 2020 Governu sei  prepara osan hamutuk millaun USD 20 hodi fó prioridade ba estrada rural iha teritóriu timor laran tomak, tanba realidade hatudu katak,  pursentu 75 mak populasaun sira hela iha área rural, nune’e Governu sei dezenvolve uluk estrada iha Munisípiu to’o Suku, atu populasaun sira bele asesu estrada ho di’ak, nune’e bele fa’an sira-nia produtu ba iha Merkadu Munisipal sira”,  hateten Rui Hernani  ba Jornalista iha Hotel Novo Turismo Lecidere Díli, Kinta (27/06).

Nia haktuir, diresaun nasionál estradas, pontes kontrolu  husi Ministériu Obras Públikas, implementa programa R4D ba jestaun estrada rural sira no R4D ne’e alinea ho Governu Timor-Leste nia planu Estratejiku Dezenvolvimentu (PED) 2011-2030,  no programa sira husi VIII Governu konstituisional nian, durante ne’e Governu Australia fornese asisténsia teknika liu husi ILO atu fó apoiu ba R4D.

“Ne’eduni iha faze ida husi programa ne’e remata ona iha fulan Marsu 2012 -2017, fornese montante osan ho ekivalensia millaun USD 30 ba investimentu kapital sira no asistensia teknika no Governu Timor-Leste, kontribui ona Millaun 23 ba obras estrada fíziku nian”,  katak Rui.

Entretantu, Ministeriu Obras Publikas ba oin sei la simu proposta, maibé projetu sira hotu sei tuir konkursu tenderizasaun, nune’e Governu bele halo kontrolu hodi hadiak ninia kualidade  projetu.aba