MF sei instala sistema jestaun finanseira iha RAEOA

Sekretaria Rejional  das Finansas  Zona Espesial Ekonomia Sosial Merkadu  (ZEESM), Leonia Monteiro informa, durante tinan lima nia laran, ZEESM utiliza sistema manual ba jestaun finanseira ZEESM nian, maibé liu husi konkordansia  entre Governu sentral liu husi Ministériu Finansas (MF).

“To’o agora jestaun finanseira, ami sei hala’o jestaun ho sistema manual hanesan Excel, ne’ebé bele aplika oinsa atu bele halo kontabilidade di’ak liu, maibé ami halo kontrola maka’as, tanba ami liga diretamente ho banku para lor-loron ami iha konsiliasaun bankaria, hodi  hatene kona ba ezekusaun orsamentu. Ami fiar katak, durante ne’e ami la’o di’ak tanba ami halo relatóriu trimestrial, annual,  ba Governu sentral, no mós  relatóriu ba Tribunal das Kontas”, informa Leonia ba Jornalista sira iha Rejiaun Administrativa Espesial Oe-cusse Ambeno (RAEOA), Segunda (09/07/2019).

Leonia haktuir, total orsamentu ZEESM nian husi tinan 2015 to’o agora hamutuk Millaun USD 577, hahú iha tinan 2015 orsamentu millaun USD 133, 2016  millaun USD 217, 2017  millaun USD 117,  no iha tinan 2018 tanba orsamentu duo désimu, entaun aloka de’it millaun USD 28, no tinan 2019 millaun  USD 76.

“Foin dadauk ami halo ona proposta tan  millaun USD 137, para kompleta obra sira ne’ebé mak iha Oe-cusse, tanba obra sira ne’e kompremetidu hotu ona husi tinan lima ne’e ami la iha dívida ba obra sira ne’ebé mak implementa iha Oe-cusse, ezekusaun hotu tuir planu ne’ebé mak ita iha, orsamentu ne’e ami gasta millaun USD 350, no sei falta millaun USD 116”, relata Leonia.

Enkuantu reprezentante Ministériu Finansas, Joanico Pinto, ne’ebé nu’udar Xefi Unidade Sistema Integradu Informasaun Jestaun Finanseira hateten, delegasaun Ministériu Finansas marka prezensa iha RAEOA,  atu hatutan konkordánsia entre Governu ho ZEESM, iha loron 1 fulan Marsu tinan 2019, kona ba prosesu no progresu atu implementa reintegrasaun ezekusaun orsamentu RAEOA/ZEESM, ba iha sistema jestaun  finanseira ne’ebé Governu sentral dadaun ne’e utiliza hela.

“Portantu iha ami nia aprezentasaun ne’e, primeriu mak atu mai esplika kona ba to’o iha ne’ebé ona ami nia servisu tékniku ne’e, saida de’it mak ami presiza iha autoriedade RAEOA, no ba oin saida mak ami atu halo tan para depois atu bele reintegra ZEESM iha sistema ne’e”, salienta Joanico.

Entretantu Prezidenti Autoriedade RAEOA no ZEESM, Marí Alkatiri ne’ebé hala’o abertura ba iha aprezentasaun ne’e konsidera, sistema ne’ebé  Governu sentral utiliza , la’os sistema foun , maibé sistema tuan ne’ebé loke fila fali,  tanba sistema ne’e modernu liu ona.

“Ha’u hanoin sistema ne’e importante, para ema matenek na’in sira atu ajuda ita  atu halo sasan di’ak liu no servisu di’ak liu, atu uniformiza no harmoniza teknolojia,  bainhira ha’u kontinua mandatu iha RAEOA reprezenta Estadu sei implementa sistema free balance,  tanba desde  inísiu ha’u husu ona sistema ne’e atu implementa iha Oe-cusse”, fundamenta Marí Alaktiri.oly