Alkatiri:Ekonomia iha Díli la funsiona

Sekretáriu Jeral partidu FRETILIN, Marí Alkatiri hateten, nia triste tebes haree Díli ne’ebé hanesan kapital nasaun Timor-Leste (TL), maibé nia ekonomia la funsiona. Tanba ne’e, Alkatiri husu Governu atu fó atensaun ba kestaun ida ne’e, hodi bele rezolve urjenti.

 “Ita bo’ot (jornalista) hatene katak, ekonomia Díli funsiona ka la’e, la funsiona, ha’u loron hira ne’e la’o ba vizita loja armajen, vizita farmasia buat sira ne’e hotu, para atu haree ekonomia la’o halo oinsa, antes atu komesa ko’alia fali, governu tenki funsiona, osan iha, governu iha, tanba saida mak ekonomia la la’o, membru governu la kompletu troka”, hateten, Marí Alkatiri, ba GMN iha studio Bebora Díli, Kinta (17/08/2019).

Alende ne’e, eis Prezidente Rejiaun Administrativa Espesial Oe-cusse Ambeno ne’e haktuir, durante loron hira ne’e nia observa situasaun iha Díli laran, ne’ebé Governu komesa lufu lafu malu ho projeitu emerjensia, tanba atu selebra loron referendum ba tinan 20 iha loron 30 fulan ne’e.

Tuir Alkatiri, projetu emerjensia ne’e, hanesan kustume aat Governu nian hodi fakar osan, tanba projetu emerjensia ne’e, la liu husi tenderizasaun.

 “Ha’u lakonkorda ida nee, ita hatene ona katak iha dezde 1999 que 2019 halo 20 anos, ita lahatene, la’os agora besik ona falta fulan ida ba fulan rua atu ba halo festa mak ita halo rehabilitasaun, ne’e emerjensia para fakar osan nian”, hateten Marí Alkatiri.mya