Gualdino: Minerais TL barak mak iha valor ekonómiku

Prezidenti Autoridade Nacional do Petróleo e Minerais (ANPM), Gualdino da Silva informa, minerais iha Timor-Leste (TL) barak mak iha valor ekonómiku, nune’e bele fó reseita ba Estadu.

“Projetu lei kódigu mineiru ne’e, atu haree minerais sira ne’ebé ho valór ki’ik, indústria ho valór ekonómia ne’ebé boot no sei regula deit ba rai maran. Minerais iha TL ne’e barak mak iha valor ekonómiku ne’ebé bele fó reseita ba Estadu TL, nune’e ita bele uza, bele fó reseita ba nasaun kuandu ita dezenvolve, hanesan rekursu naun metalikus, sementi no marmores, minerais metalikus mak hanesan osan mean manganes, sira ne’e presiza estudu atu bele mellora liu tan ninia existensia kuantidade no kualidade distribuisaun, ita tenki halo estudu liu tan”, Prezidenti ANPM ba jornalista sira iha Parlamentu Nasional (PN), hafoin audénsia ho komissaun D Parlamentu Nasional (PN), hodi ko’alia kona-bá projetu lei kódigu mineiru ne’ebé atu regula prosesu minerais, iha PN, Kuarta (02-10-2019).

Gualdino hateten, estudu prelimináriu ministériu petróleu liu husi Instituto do Petróleo e Geologia (IPG) identifika katak, iha menerais lubuk ida mak iha valor ekonómiku wainhira Timor-Leste dezenvolve.

“Projetu lei kódigu mineiru ne’e oinsa atu regula aktividade mineiru ba minerais hotu, hahú husi peskiza buka mineral, halo estrasaun to’o iha aktividade minerais halo rehabilitasaun ba fatin minerais ni’an, faze ne’e hotu husi inísiu buka to’o iha rehabilitasaun ne’e kobre ona iha projetu lei, ida ne’e iha mós típu lisensa oi-oin minerais sira, kona-bá tasi laran iha futuru ita sei haree tratamentu la hanesan, ita nia estudu prelimináriu husi Ministériu Petróleu Rekursu Minerais, tanba ita iha minerais lubun ida mak iha valor ekonómiku”, tenik Prezidenti ANPM.

Husi sorin seluk, Prezidenti Komisaun D PN, Virgínia Ana Belo hateten,  lei kódigu mineiru ne’e importante tebes, atu nune’e TL labele dependensia deit ba fundu mina-rai, maibé tenki buka alternativu seluk.

Tuir nia, lei kódigu mineiru ne’e importante tebes, tanba durante ne’e Estadu depende deit ba fundu mina-rai.

“Lei ida ne’e fó oportunidade ita atu dezenvolve, ita espera rezultadu husi IPG ne’ebé hetan riku-soin Timor ne’e bele ajuda ita nia ekonómia reseita doméstiku ba ita bele dimíniu dependensia ba fundu petroleum, TL iha riku-soin barak ne’ebé fora husi fundu petróleu lei kódigu mineiru ida ne’e, fó oportunidade atu dezenvolve, espera ho rezultadu husi IPG bele ajuda dependensia ba fundu petroleum”, subliña Virgínia.

Antes ne’e, prezidente PN, Arão Noe hateten, lei kódigu mineiru regula kona-bá prosesu mineral ni’an, ne’e duni lei ne’e importante iha III lejislatura ne’ebé la konsege aprova to’o final global, tanba mandatu hotu. ety