AIFAESA prosesa infratór hamutuk 94 tanba komete infrasaun

Koordenadór Autoridade Inspesaun no Fiskalizasaun ba Atividade Ekonómika, Sanitária no Alimentár, Institutu Públiku (AIFAESA,I.P) Abilio Oliveira Serreno, hatete, durante tinan 2019 AIFAESA prosesa infratór hamutuk 94 ba Ministériu Públiku (MP) tanba komete infrasaun no  hetan sansaun hosi AIFAESA atu selu multa maibé infratór hirak ne’e lakohi selu.

“Ami prosesa infratór hamutuk 94 ba iha Ministériu Públiku(MP),tanba komete infrasaun hodi kontra regra negósiu nian, hanesan lisensa kompañia mate, sasan expire, halo servisu la tuir lisensa inklui falsifikasaun marka ba sasan,”informa Koordenadór AIFAESA,I.P,Abilio Oliveira Serreno, ba JN-Diário Kuarta (22/01/2020) iha Matadoru Díli.

Koordenadór AIFAESA dehan, infratór 94 ne’e mai hosi kompañia no negosiante sira iha supermerkadu, ne’ebé oras ne’e prosesu iha ona MP, hodi fo notifikasaun ba infratór sira atu selu multa tuir sansaun ne’ebé AIFAESA aplika ba sira.

“Bainhira infratór sira lakoi selu multa tuir sansaun ne’ebé ami fó, mak prosesu ne’e sei lori to’o Tribunál. Sansaun multa ne’ebé aplika ba infratór sira kiik liu mak  mil dolar (1000), maibé ba sasan expire multa 5 mil, protudu estraga 10 mil, inklui ba konstrasaun sivíl fraode, bele kona multa hosi 3 ba to’o 20 mil”, afirma Abilio Oliveira Serreno.

Nia subliña, durante tinan 2019 AIFAESA rekolla reseita hosi negosiante no kompañia sira menus, tanba sira komesa hatene ona regra negosiu nian.

“Ami hetan negosiante sira ne’ebé komete infrasaun komesa menus iha tinan 2019, ho nune’e reseita ne’ebé ami rekolha iha deit 82.000.00, mak hatama ona ba kofre Estadu”.Fel