Janeiru 2020, AIFAESA hatama ona osan USD 6.300 ba kofre Estadu

Autoridade Inspesaun no Fiskalizasaun Atividade Ekonómika Sanitária no Alimentar (AIFAESA), iha fulan Janeiru 2020, hatama osan USD 6.300 ba kofre Estadu.

Kordenador AIFAESA, Abilio Oliveira Sereno, esplika, osan hirak ne’e, hetan husi inspesaun ne’ebé AIFAESA ni’an, ne’ebé durante ne’e hala’o ba loja, restaurante no kompañia sira ne’ebé viola regras konsumedor nian.

Husi Janeiru to’o agora, AIFAESA halo ona inspesaun ba loja no restaurante sira, hamutuk 408.

“Ami halo ona inspesaun ba 408 estabelesimentu, 353 mak laiha buat ida, la’o di’ak no 117 mak hetan infrasaun submete ona ba prosesu hodi haree ba koima, no kompaña 7 mak selu ona koima, koima husi janeiru ami hatama ona reseita ba Estadu hamutuk USD 6.300”, dehan, Kordenador AIFAESA, Abilio Oliveira Sereno ba JN-Díario iha nia knar fatin, Matadoru, Segunda (17/02/2020).

Husi númeru 408 ne’e, númeru 102 mak haruka ona ba iha Ministériu Públiku (MP), hodi prosesu tuir dalan legal, tanba lakohi selu koima ba Estadu.

Iha opurtunidade ne’e mos, Autoridade Inspesaun fiskalizaun Atividade Ekonómika Sanitaria no Alimentar (AIFAESA), to’o agora seida’uk iha laboratóriu hodi identifika produtu sira ne’ebé mak hakerek ho letra xina nian.

kordenador AIFAESA, Abilio Oliveira Sereno hateten, durante ne’e AIFAESA hasoru difikuldade kona-ba atu detekta hahan sira ne’ebé mak hakerek ho letra xina inklui ho lian seluk, tamba  to’o agora AIFAESA seidauk iha laboratóriu rasik.

Ho difikuldade ne’e, AIFAESA kontakta ona parampon atu lori produtu hirak ne’e ba halo teste, maibé seidauk bele realiza, tanba dadaun ne’e iha hela rejime duodesimal.

“Ami nia nia orsamentu seidauk aprova mak sira ne’e paradu, ami aumenta tan ami nia serbisu la’os loron de’it, halo mós kalan, maibé buat ida ke bele ajuda ami para identifika produtu sira ne’e di’ak ka la di’ak mak laboratóriu, ne’e ami seidauk iha, ami mós reuniaun ho oms, kona-ba hahan ami alerta, atu haree bele tuur hamutuk halo inspesaun ho ami departamentu laboratóriu,laboratóti importante tebes ba ami para bele identifika sasan sira hakerek ho letra xina no mós ho lian seluk ”, hateten Kordenador AIFAESA, Abilio Oliveira Sereno.

AIFAESA mós, hato’o ona preokupasaun ne’e ba parte relevante sira, nune’e bele serbisu hamutuk hodi haree kestaun ne’e ho sériu.Ina