Deskonfia manipula folin sasan, AIFAESA-PNSIK halo inspesaun urjente ba loja jacinto foun

Autoridade Inspesaun no Fizkalizasaun Atividade Ekonomia Sanitária no Alimentar (AIFAESA) no Polísia Nasionál Sientífika Investigasaun Kriminal (PNSIK) halo inspesaun urjente ba loja jacinto foun, tanba deskonfia manipula presu maskra.

Hafoin simu keixa, iha Sesta (27/03/2020) husi konsumidór balun, Autoridade Inspesaun no Fizkalizasaun Atividade Ekonomia Sanitátria no Alimentar (AIFAESA).

Nune’e iha Sábadu (28/03/2020), ekipa AIFAESA hamutuk ho Polisia Nasionál Sientifika Investigasaun Kriminál ka PNSIK, halo inspesaun urjente ba loja jacinto foun, ne’ebé deskonfia, manipula folin sasan.

Iha inspesaun no atuasaun ne’e, ekipa konjunta AIFAESA ho PNSIK, identifika presu maskra ne’ebé bai-bain ho folin, USD  2.50 ne’e, maibé loja refere fa’an fali ba folin USD 19.50 kada pakote.

Iha inspesaun ne’e mos, ekipa inspensaun, rekoella mos maskra kaixa ida, ne’ebé iha laran hamutuk pakote 49.

Xefe Divizaun Operasaun AIFAESA.IP, Alfonsius Costa Akoyt,  ba jornalista sira hateten, inspesaun ne’e hala’o, bazeia ba keixa ne’ebé AIFAESA simu no reklamasaun hosi konsumedór.

“Inspesaun konjuta ohin loron ne’e bazeia ba keixa ne’ebé ami simu reklamasaun husi konsumidóres sira kona-ba presu maskra ne’ebé faan ho folin ne’ebé sa’e liu fali ho folin normal tanba ne’e, ohin ami halo atuasaun ami hamutuk ho PNSIK identifika lo’os duni tuir keixa ne’ebé mak iha ema ne’e sosa pakote ida plastik ida ho folin USD 19.50 ami ba konfirma duni faktus ne’e los duni, tanba ne’e parte PNSIK konsidera krime tuir sira nia haree bazeia ba lei alende dekretu lei númeru 4/2011 ne’ebé kriminaliza pratika espekulasaun hasa’e sasan folin”, dehan, Xefe Divizaun Operasaun AIFAESA.IP, Alfonsius Costa Akoyt ba Jornalista sira, Sabádu (28/03/2020).

Hafoin halo inspesaun, Polísia Sientifika Investigasaun Kriminal mos bolu kedas loja nain ho inisial CL, ho nia funsionáriu balun, hodi halo investigasaun.

Observasaun Jornalista GMN nota iha terrenu hatudu katak, prosesu investigasaun ba CL ne’e la’o kuaze oras rua resin.

Antes ne’e Diretór Operasaun AIFAESA.IP, Gabriel da Costa apela ona, ba importantadór no distribuidór sira, atu labele inventa folin sasan, iha situasaun emerjénsia nia laran, hodi buka lukru dúbru, maibé tenke mantein nafatin presu normál, ne’ebé durante ne’e aplika ona.

Alénde ne’e AIFAESA mós hato’o ona ba públiku katak, negósiante sira ne’ebé mak aproveita situasaun emerjénsia, hasa’e folin sasan, sei hetan sansaun ka multa rihunUSD 30.000 no sei kadeia tinan tolu.

Fó hanoin mós katak, iha semana kotuk, ekipa konjunta mós halo ona inspesaun no atuasaun ba xinés na’in walu ne’ebé mós komete fraude ka inventa folin sasan.Ina

 

 

Leave a Reply

Your email address will not be published. Required fields are marked *