SEFOPE: Kompañia iha TL labele termina kontratu traballadór iha periodu EE

Sekretariu Estadu Formasaun Profisional no Emprego (SEFOPE), liu husi Inspetur Jeral do Traballo, Rofinu Lopes dos Reis, husu ba kompañia hotu-hotu ne’ebé mak eziste iha Timor-Leste(TL), atu labele hapara kontratu ba traballadór sira durante Estadu Emerjénsia (EE).

“Hau hanoin iha situasaun de Emerjénsia ida ne’e, inspesaun jeral do traballo husu ba kompañia hotu-hotu, hodi nune’e  labele iha aproveita situasaun ida ne’e, hodi halo terminasaun kontratu ba trabalhador sira,”

Lia hirak ne’e hato’o husi, Inspetur Jeral do Traballo SEFOPE, Rofinu Lopes dos Reis ba jornalista GMN iha nia knaar fatin, SEFOPE, Caicoli, Kuarta (16/04/2020).

Inspetur ne’e aprofunda liutan, ba kompañia hotu-hotu, katak Estadu Emerjénsia ligasaun ho Surtu COVID-19, atu labele aproveita situasaun ne’e hodi halo terminasaun ba traballadór hotu-hotu.

“Moras ida ne’e afeita ba mundu tomak, maibé husu ba sira atu labele halo termina iha kontratu ba traballadór, signifika sira labele hakotu relasaun serbisu, iha situasaun ida nene’e labele mós aproveita situasaun ida nene’e hapara traballador sira,” dehan nia

Inspektur ne’e reforsa liutan, wainhira kompañia halo suspensaun, ba taraballadór, governu sei konsidera tamba relasiona ho situasaun, maibé kuandu, Estadu Emerjénsia ne’e remata, traballador fila fali serbisu hanesan baibain.

“Ida ne’e mak ami sujere ba kompañia hotu-hotu, desde Estadu Emerjénsia ne’e fó sai kompañia barak mak konsulta mai ami oinsa ami nia traballador ami sujere ba sira hato’o ba sira atu labele terminasaun kontratu”,haktuir, Inspetúr ne’e.

Suspensaun iha periodu Estadu Emerjénsia ne’e ema hotu konsidera tamba ne’e iha situasaun Estadu Emerjénsia, iha impaktu mak sei limita direitu nomós dever balun.Luc