Benefisiáriu balun simu subsídiu USD 100 dobru

Ministru Reforma Lejislativa Asuntu Parlamentár no Komunikasaun Sosiál (MRLAPKS), Francisco Jeronimo, informa, durante pagamentu subsídiu USD 100 ba fulan rua (2), ba kada família iha munisípiu 12, benefisiáriu balun simu dobru.

Tanba ne’e, nia parte subliña, Governu rasik sei buka tuir benefisiáriu ne’ebé simu subsídiu dobru, hodi prosesa tuir dalan legál.

“Ha’u hateten katak reklamasaun sira ne’e sei rezolve hotu, maibé númeru ne’ebé mak reklamadu sei halo verifikasaun loloos, kuandu loos ona sei halo pagamentu, mesmo que Estadu Emerjénsia (EE) remata. Sira ne’ebé simu dobru ka sira naran iha fatin ida ba simu tiha, ba simu tan iha fatin seluk, ha’u hanoin ne’e husu ba konsiénsia uma kain ida-idak, maibé ba parte Governu sei buka tuir no bolu para atu hatene loloos, tanba saída mak imi simu dala rua”, MRLAPKS ne’e hafoin partisipa plenária iha Parlamentu Nasionál (PN), hodi rona intervensaun deputadu sira ni’an, Segunda (29-06-2020).

Francisco informa, hafoin prosesu pagamentu Governu mós simu ona reklamasaun hamutuk rihun 11 resin.

Nune’e, nia parte kompromete reklamasaun sira ne’e sei rezolve iha tempu besik, tanba sei iha prosesu verifikasaun, hafoin halo pagamentu fila-fali. san