Selu traballadór porsentu 60, Prezidente INSS nia deklarasaun diferente

Prezidente Institutu Nasional Seguransa Sosial, Longuinhos Armando, hateten, Governu seidauk halo pagamentu subsídiu pursentu 60 ba traballadór empreza privada sira seidauk halo, no informasaun ne’e kontráriu ho nia deklarasaun antes katak pagamentu ne’e hahú halo ona iha loron 9, fulan juñu, tinan ne’e.

Iha entrevista ida ho GMN iha Tersa (10/6/2020), Prezidente Institutu Nasional Seguransa Sosial, Longuinhos Armando, hatete, pagamentu subsídiu porsentu 60 ba traballador empreza privada sira halo ona ba traballador 605.

“Komesa husi dia 9 ate agora ita selu ona USD 278.306 ne’ebé que ita transfere ona ba iha kompañia sira pois ami mos halo ona komunikasaun ho Ministériu Finansas ho Diretor Jeral katak iha tempu badak sei halo transfer direta mai iha Institutu Nasional Seguransa Sosial nia konta bankaria depois pedidu ne’ebé que tama mai ita verifika hotu transfere dadauk ona”,dehan Longuinhos Armando.

Ba kestaun ne’e GMN mos hetan konfirmasaun ona ho traballador ida katak, nia simu duni tranferensia pagamentu subsídiu estraordinariu ho montante total hanesan ho porsentu 60 ba nia saláriu mensal ba fulan tolu iha Kuarta Feira semana uluk.

Bainhira GMN tenta husu klarifikasaun kona ba asuntu ne’e, Longuinho Armando dehan, pagamentu seidauk halo ba ema ruma tanba sei hein orsamentu COVID-19 husi Ministériu Finansa. Maibe nia sei konfirma ho nia tékniku sira karik ida ne’e akontese duni.

“Se ida ne’e mak los hau konfirma lai ba hau nia tékniku sira ne’e (Osan ne’e) tama duni ka lae. Hau atu klarifika katak, ami seidauk iha transfer ruma”,dehan Longuinho Armando ba GMN, Kuarta (17/6/2020).

Prezidente INSS, Longuinhos Armando, haktuir, subsídiu porsentu 60 sei transfere tuir kompañia ne’ebé atu selu to’o fulan hira. GMN