BCTL sei implementa programa moratóriu kréditu ba empreza no komunidade

Iha loron 24, fulan ne’e, Governadór Banku Central Timor-Leste (BCTL), Abrão de Vasconselos, hateten, Governu liu husi  BCTL implementa programa moratóriu kréditu, hodi  apoiu rekopera fali finanseiru husi  empreza no mos komunidade durante periodu Estadu Emerjénsia (EE).

“Iha inisiu bainhira hahu implementa EE Governu Timor-Leste konsidera programa lubuk ida, programa sira ne’e oinsa mak ajuda tulun ita nia populasaun, ita nia empreza, tanba kestaun ida lock down, entaun programa ida ne’ebé Governu konsidera iha altura ne’eba mak oinsa atu introduz moratoriu de kréditu ida, objetivu atu tulun individu, empreza atu hanesan relax tiha sira nia situasaun cash block”, Abrão de Vasconselos ba GMN, Sesta (24/07/2020), iha edifísiu BCTL, Díli.

Abrão esplika, bainhira komunidade ka empreza ruma iha insiativa atu tuir programa kreditu refere, tenke liu husi sistema online ne’ebé sira estabelese ona.

“Iha inisiu dezain programa ida ne’e, BCTL servisu hamutuk ho Governu, iha altura ne’eba bainhira introduz hela Estadu Emerjénsia, entaun banku sentral ajuda Governu ho banku komersiál sira dezenvolve tiha sistema ida, sistema ida ne’e mak agora uza aplikasaun ida ne’e, ba motuariu sira ne’ebé hakarak partisipa sira prepara sira nia rekerimentu ba sira nia aplikasaun, uza formulariu ne’ebé banku sentral online, ita boot sira bele haree iha públikasaun iha banku sentral ni’an, formulariu ne’e tau online, iha ne’eba formulariu 2, ida individual no ida imprensa”, esplika nia.

Iha loron 5, fulan Juñu, Prezidente Republika (PR) promulga ona dekretu lei kona-ba programa moratoriu kreditu, tuir planu programa moratóriu kreditu  ne’e sei implementa iha loron ida fulan Agostu to’o iha loron 31, fulan Outubru, tinan ne’e. Jen