Ekonomia Timor-Leste porsentu 90 sai ba rai-liur

Ekonomia Timor-Leste (TL) pursentu 90 semo sai ba rai-liur, tanba dependensia demais ba sasán inportasaun.

Asuntu ne’e hato’o hosi eis- Reitor Dili Institute of Technology (DIT), Manuel Vong, bainhira sai oradór  iha semenáriu  estudante DIT sira nian kona ba  rekuperasaun ekonomia iha era pandemia COVID-19 iha kampus Manleuana, Dili, Kinta (9/8/2020).

Tuir eis Ministru Turizmu ne’e nia observasaun, durante ne’e Timor-Leste sosa aihan, roupa inklui sasán sira maioria importa hosi rai liur.

“Ita hotu hatene katak durante ne’e Aihan nesesidade bázika sira ne’e mai hosi rai-liur hanesan fos, mina, Roupa no seluk tan. signifika osan Timor nian ne’e lori hotu ba rai liur nune’e porsentu 10 deit mak iha rai-laran, tanba ita ladun fó importansia ita-nia produtu lokal sira hodi fa’an ba rai-liur”, hateten Manuel Vong ba GMN iha DIT.

Eis-Governante ne’e mos enkoraja Timor-oan hotu atu sosa produtu rai-laran hodi osan bele sirkula iha rai-laran.

“Hanesan Timor-oan husu ba maluk Timor-oan hotu atu hadomi ita-nia produtu lokál hodi sosa mos ita-nia produtu lokál nune’e osan bele sirkula fali iha ita-nia rai-laran, tanba durante pandemia ne’e ekonomia mundial tun inklui Timor Leste nian”, katak Manuel.

Oradór  husi USAID, Peter Simone, hateten, Timor-Leste nia otél sira ne’e karun liu kompara ho nasaun sira seluk hodi fó duvida ba turista sira atu mai.

Oradór ba semináriu rekuperasaun ekonomia iha era pandemia COVID-19 ne’e mak eis-Ministru Edukasaun, João Cancio Freitas, panelista husi USAID, Peter Simone, inklui Eis Ministru Turizmu, Manuel Vong.

Partisipa iha semináriu ne’e mak hanesan Reitor DIT, Dekanu, Dosente no Estudante hosi Fakuldade Ekonomia Departamentu Turizmu. aba