MTK rekoñese reseita doméstika la sufisiente

Ministériu Transporte no Komunikasaun (MTK) rekonese reseita doméstika la sufisiente, atu sustenta nasaun nia vida.

Ministru Transporte no Komunikasaun (MTK), José Agustinho da Silva, hateten, ho reseita doméstika ne’ebé durante ne’e labele sustenta nasaun, liu-liu ba finansiamentu salariu, bens ba funsionariu iha Timor-Leste.

“Ita nia reseita doméstika ne’e rasik seidauk para bele sustenta ita nia nasaun nia vida, reseita doméstika oinsa finansia salariu vensimentu funsionariu ni’an mós seidauk to’o, tanba ne’e eselensia sira MTK, nia kondisaun real no atual ita bele koalia katak triste tebes, ministériu ida ne’e ita kuandu haree ba kotuk, orsida hamutuk ho MOP orsida fahe malu, tanba ne’e, oinsa ita bele fokus ba servisu oinsa mak minoria iha transporte marítima, terestre, áero no komunikasaun, iha obstakulu oi-oin”, dehan, Ministru Transporte no Komunikasaun, Jose Agustinho da Silva, iha Caicoli-Dili, Kinta (23/07).

Governante ne’e informa, reseita doméstika ne’ebé mak rekolla husi fulan Janeiru to’o fulan Jullu ne’e ho montante USD millaun 3, tanba impaktu husi surtu COVID-19 no durante ne’e kanal 22 husi áeroportu funsiona, maibé ho COVID-19 ne’e afeta ba kanal hirak ne’e, nune’e dau-daun ne’e kanal 7 de’it mak sei funsiona.

Maske nune’e, ministru ne’e iha esperansa ba kanal hirak ne’ebé mak to’o oras ne’e seidauk ativa, sira nia parte sei haree no hadi’ak liu tan, nune’e kanal hirak ne’e, bele funsiona hotu, atu bele suporta no rekolla hodi hasa’e reseita doméstika. Ina

Leave a Reply

Your email address will not be published. Required fields are marked *