Pagamentu atraza, kompañia 50 ezije MS halo klarifikasaun

Empreza 50 resin ezije hodi husu ba Ministériu Saúde (MS), atu halo klarifikasaun lolos kona-ba pagamentu ne’ebé mak atraza hodi implika ba sira-nia empreza. Tanba Ministériu Saúde promete atu selu maibe to’o agora la selu.

Reprezentante Kompañia Catering LFLLF Unispesoal Limitada, Amaro Araújo, hateten, prezensa iha Ministériu Saúde (MS), hodi husu lolos klarifikasaun ba Governu liu-liu Ministériu Saúde, kona-ba pagamentu ba Hotel no kompañia hirak ne’ebé Governu halo kontratu, hodi oferese hahán ba sidadaun sira iha fatin kuarentena no izolamentu iha ambitu surtu COVID-19.

Reprezantante ne’e, husu ba Ministériu Saúde atu halo esplikasaun lolos kona-ba to’o ohin loron lada’uk halo pagamentu ba sira.

Amaro Araújo informa, hahan ne’ebé mak durante ne’e sira apoia, ba ema sira ne’ebé iha kuarentena no izolamentu, sira gastu osan hodi prepara ai-han kuaze dolar atus tolu kada loron.

Tamba ne’e, Amaro afirma, bainhira ejizensia ne’e la hetan resposta husi Ministériu Saúde, sira sei ba hato’o mós iha Primeiru Ministru, Taur Matan Ruak, tanba Sentru Integradu Jestaun Krize lidera husi Xefe Governu.

“Ami nia pagamentu seidauk, tanba ami oferese hahan emerjénsia ba ema sira ne’ebé iha karantina emerjénsia nia laran ami servisu makaas to’o fulan rua, to’o fulan ona pagamentu laiha rezultadu ami mai ezije sira dehan semana oin, semana oin kompañia uluk ami hetan tein balun husi ministériu saúde duni balun husi MTCI ami mai ministériu saúde entaun ami mai fali saúde pagamentu no kontratu saúde mak halo”, dehan, Reprezentante Kompañia Catering LFLLF Unipesoal Limitada, Amaro Araújo, ba Jornalista iha Ministériu Saúde, Caicoli, Kinta (02/07).

Hatan ba kestaun ne’e, Ministra Saúde, Odete Maria Freitas Belo responde katak, iha ona orsamentu atu halo pagamentu, maibé dadaun ne’e, ministériu saúde sei halo verifikasaun ba dokumentu hotu, ho nune’e mak halo pagamentu atraza.

Maibé Governante ne’e, lakohi promete bainhira mak atu halo pagamentu ba kompañia hirak ne’e, maibé tuir nia iha ona orsamentu hein de’it atu selu.

“Pagamentu atraza, ita tenke haree fila-fali dokumentu sira ne’ebé laiha entre kontratu ne’ebé mak entre ami ho sira laiha, hili dokumentu sira ne’e tau hamutuk foin ita bele ba iha prosesu pagamentu, tanba orsamentu iha ne’eba prosedimentu pagamentu ita tenke la’o nafatin, ida ne’e mak halo atraza, orsamentu iha, ami tenke prepara dokumentu de’it para atu halo pagamentu ba sira, ha’u lakohi promete tanba iha prosedimentu prosesu pagamentu la’os ministériu saúde”, dehan, Ministra Saúde ne’e.

Fundu ne’ebé Governu aloka ba hotel hirak ne’ebé sai fatin kuarentena ba sidadadaun sira, no ai-han inklui ba pesoal seguransa sira ho montante USD rihun rua resin.Ina

Leave a Reply

Your email address will not be published. Required fields are marked *