Kresimentu ekonomia tun hahú husi VIII Governu

Kresimentu ekonomia Timor-Leste (TL), tun ba porsentu neen (6%) mai kedas husi VIII Governu konstituisionál.

Reitor Universidade da Paz (UNPAZ), Adolmando Soares Amaral, esplika, kresimentu ekonomia tun ba porsentu 6, tanba maioria depende de’it ba despeza públika, depende ba importasaun, la halo produsaun ba ai-han lokál no mós la ajuda empreza privadu hirak ne’ebé eziste.

“Kresimentu ekonomia menus ne’e akontese iha Oitavu Governu jilid primeiru no jilid segundu iha jilid primeiru, tanba impase polítiku ne’ebé la’o tempu naruk depois iha jilid segundu, tanba ita hetan ameasa husi COVID-19, nune’e faktor hirak ne’e fó impaktu maka’as ba ita nia kresimentu ekonomia ne’ebé la sa’e, mais menus ba porsentu 6, atu rekopera ida ne’e mak ita husu ba polítiku sira halo dezisaun ne’ebé di’ak, tanba povu ne’e agora besik ona ba risku, sira tenke dada sai povu ne’e husi risku,” haktuir, Reitor UNPAZ, Adolmando Soares Amaral, ba GMN iha nia kna’ar fatin UNPAZ, Kuarta (23/09/2020).

Reitór UNPAZ ne’e reforsa liu tan, atu hasai povu husi kiak no mukit, Governu labele halo de’it polítika retórika no vinga malu be-beik, maibé presiza kria polítika dezenvolvimentu ne’ebé di’ak no tau aas interese nasionál.

Orsamentu Jerál Estadu (OJE), xumba be-beik iha parlamentu nasionál fó implikasaun maka’as ba kresimentu, roda ekonomia Timor-Leste ni’an. Ina