PM seidauk simu karta husi Banco Federal América

Primeiru Ministru (PM), Taur Matan Ruak, deklara, to’o agora Governu seidauk simu karta ruma husi Banco Federal Estadu Unidu Amérika (EUA) kona-ba sei la halo transferénsia Orsamentu Jeral Estadu ba Banco Central de Timor Leste (BCTL).

Xefe Governu koalia lia hirak ne’e relasiona ho informasaun ne’ebé sai polémika iha públiku kona ba Banco Federal Amerika ne’ebé haruka ona karta ba Governu Timor-Leste foin lalais katak, sei la halo tranferénsia osan ba BCTL, maske hetan ona aprovasaun ka promulgasaun husi Prezidente Repúblika (PR).

“Ha’u seidauk simu karta ida ne’e, tanba PN seidauk aprova ita nia orsamentu, ne’e laiha problema tanba dadaun ne’e mezmu doudesimal ita osan laiha ita ba husu, maibé ha’u seidauk simu”, deklara PM Taur ba jornalista sira iha Palásiu Prezidensial, Bairu-Pité, Díli, Kinta (17/9/2020).

Antes ne’e iha entrevista ho média online balun Governadór BCTL, Abrão de Vasconcelos, hatete, prosesu transferénsia Fundu Petróleu (FP) ba konta Governu Timor-Leste estabelese ona iha lei númeru 9/2005, loron 3, fulan Agostu, kona-ba lei FP ne’ebé tuir artigu 139 konstituisaun RDTL katak, petrolíferu hanesan propriedade Estadu.

Tamba ne’e, Banco Federal bele halo transferénsia ba Governu Timor-Leste ho autorizasaun husi Parlamentu Nasionál (PN) no hetan promulgasaun husi PR. oly