PN simu ona proposta OJE 2020 ho pedidu urjénsia

Parlamentu Nasionál (PN) kinta lejislatura simu ona proposta Orsamentu Jerál Estadu (OJE) ba tinan 2020 ho montante billiaun USD 1.4 resin ho pedidu urjénsia.

Proposta ne’e entrega direita hosi Vise Ministra Finansas, Sara Lobo Brites no akompaña hosi Ministru Asuntu Parlamentares no Komunikasaun Sosial, Francisco Jerónimo, iha Tersa-feira (15/09/2020).

Hafoin entrega, Prezidente Parlamentu Nasionál, Aniceto Guterres, deklara PN sei kontinua kedas ho diskusaun no aprovasaun ba pedidu urjensia ne’e nune’e bele finaliza no hetan aprovasaun tarde liu  ba proposta OJE 2020 ne’e iha loron 8 fulan Outubru tinan ne’e.

“Aban no bainrua kedas prosesu hahú ona, kuandu pedidu urjénsia iha ona, sei tau hotu prazu másimu ne’ebé PN determina tiha ona, tarde liu 8 de Outubru ne’e tenke iha ona desizaun,” hateten PPN Aniceto Guterres, ba jornalista iha PN, Tersa (15/09/2020).

Iha fatin hanesan, Vise Ministra Finansas, Sara Lobo Brites, hateten proposta ne’e haruka ho pedidu urjénsia, tanba sei iha proposta OJE ba 2021 ne’ebé governu sei aprezenta mós iha tempu badak.

“Submisaun ida ne’e ami mai ho dokumentus ne’ebé  mak kompletu, komesa hosi proposta de lei no mós dispozisaun de motivus no justifikasaun RSE nian,” haktuir Sara Lobo.

Proposta OJE 2020 ne’e ho nia kategoria ba saláriu vensimentu, bens servisu transferénsia públikas, kapital menor no kapital dezenvolvimentu.

Entretantu, proposta Orsamentu Jeral Estadu ba tinan 2020 ne’e, aprezenta dahuluk ho montante billiaun USD 1.668, maibe sumba iha Parlamentu Nasionál, tanba bankada apoiu governu CNRT, vota abstensaun no kontra ba proposta refere. Say

Leave a Reply

Your email address will not be published. Required fields are marked *