PN husu CLN kria mekanizmu molok oferese sesta bázika

Komisaun D Parlamentu Nasionál (PN), husu Centro Logistico Nasionál (CLN), atu kria mekanismu di’ak, molok atribui sesta bázika ba povu.

Membru Komisaun D iha Parlamentu Nasionál, ne’ebé trata asuntu Ekonomia no Agrikultura, Mariano Assanami Sabino, husu ba Governu, liu-liu CLN atu estabelese mekanismu ne’ebé di’ak, antes oferese nesesidade bázika ba populasaun iha teritoriu tomak, tanba durante ne’e CLN mak asegura stok foos iha armazen sira.

Deputadu bankada demokrátika ne’e hateten, PD konkorda ho apoiu sesta bázika ne’e, tanba bele ajuda komunidade iha teritóriu tomak.

Eis Ministru Agrikultura no Peskas ne’e esplika liu tan, molok Governu atu realiza nia planu, presiza iha uluk dadus molok implementa promesa.

Antes ne’e, Governu deklara ona katak, apoiu sesta báziku ne’e, Governu sei uza modelu rua mak, atribui direta sasan bázika no ida seluk mak sei atribui de’it kupon, mak populasaun sira, bele ba foti sasan iha loja hirak ne’ebé Governu kontratu ona.

Tuir planu, sesta bázika ne’ebé Governu atu oferese, sei realiza iha fulan Novembru no Dezembru tinan ne’e.

“Uluk ita estabelese loja do povu ne’e to’o iha kraik, mais ne’e tanba ikus buat ne’e la la’o di’ak ha’u haree katak CLN mak estabelese ninia mekanismu distribuisaun to’o iha kraik ne’ebá oinsa tanba durante ne’e CLN maka responsabilza li-liu oinsa mak lojistiku apoiu ba to’o iha kraik ne’e em prinsipiu partidu demokratiku fó apoiu tomak tanba iha situasaun dífisil povu hasoru ita presija fó apoiu liu-liu fó nesesidade bázika ne’e tanba sé ita fó osan dala ruma uza ba buat seluk maibé, ita fó nesesidade bázika ita fó aproveitamentu ba família husi labarik sira ho di’ak em prinsipiu ita aseita maibé mekanismu tenke di’ak para labele iha diskriminasaun”, dehan, Membru komisaun D ne’e ba GMN, iha PN Segunda (05/10).

Objetivu husi medida ne’e, atu estímula ekonomia iha kurtu-prazu, fó insentivu ba produsaun no  komérsiu, iha ámbitu planu rekuperasaun ekonomia nasionál.

Ho medida ne’e, Governu prevé katak, bele ona kontribui atu mellora direta alimentár no nutrisionál família Timor-Leste, ne’ebé hetan impaktu negativu tanba menus rendimentu.

Benefisiáriu sira husi sesta bázika ne’e maka, ema sira-ne’ebé nu’udar agregadu familiar, inskreve ona iha “livru rejistu uma kain”, ne’ebé hela iha territóriu nasionál tomak, iha momentu ne’ebé hala’o distribuisaun, ba sesta bázika ne’e.

Medida ne’e bele tulun família sira, atu sustenta sira-nia nesesidade bázika, nune’e bele kontribui atu kombate hamlaha.Ina