PR Lú Olo promulga ona OJE 2020

Prezidente Repúblika (PR), Francisco Guterres “Lú Olo”, uza nia kbi’it konstitusionál promulga ona Dekretu husi Parlamentu Nasionál (PN) N.° 23/V – Orsamentu Jerál Estadu 2020.

Tuir komunikadu imprensa husi Gabinete Prezidénsia Nicolau Lobato, Díli, Segunda (19/10/2020), haktuir, PR konklui katak, Dekretu PN tuir presupostu no rekezitus ne’ebé iha konformidade ho dispozisoins aplikáveis Konstituisaun Repúblika no nia lei sira no mós kondisoens polítikas ba nesesidade, konveniénsia no preménsia no nune’e promulga ohin (19/10) Lei Orsamentu Jerál Estadu (OJE) ba tinan 2020.

PN aprova OJE ba tinan 2020 ho valór globál 1.497,04 milloens dolares amerikanu. Dotasaun orsamentu fahe tuir klasifikasaun ekonómika tuir mai: USD 207,3 milloens ba saláriu no vensimentus USD 563,0 milloens ba Bens i Servisu, USD 504,3 milloens ba Transferénsia Públika, USD 9,2 milloens ba Kapitál Menor no USD 213,4 milloens ba Kapitál Dezenvolvimentu.

Osan ne’ebé gasta tiha ona husi Janeiru 2020 to’o agora, liu husi rejime duodesimál, tama mós iha OJE 2020 ne’ebé PR promulga no PN haruka ona ba Jornál Repúblika.

Nune’e, OJE 2020 ho montante total temi iha leten, refere ba despeza ne’ebé halo tiha ona no sei hala’o to’o fulan Dezembru, tinan 2020. Orsamentu ne’e inklui despeza ba estabilizasaun ekonomia husi efeitu negativu COVID-19 no husi udan no mota-sa’e iha sidade Díli no sei kobre medida ba rekuperasaun ekonómika, iha ámbitu Planu Rekuperasaun Ekonómika, aprovadu husi VIII Governu Konstitusionál, iha fulan Agostu, tinan 2020.

Dekretu PN númeru 23/V aprovadu husi PN iha loron 8, fulan Outubru, tinan 2020 no PR simu iha loron 9, fulan Outubru, tinan 2020. MÍDIA PR