Prezidente Parlamentu Nasionál (PN) interinu, Luis Roberto, baixa ona proposta lei Orsamentu Jerál Estadu (OJE) tinan 2021 ba komisaun sira, liu husi plenária iha PN.
“Proposta lei husi Governu ne’ebé distribui ona ba ita boot sira-nia liman, halo favor hala’o servisu ba tuir ida-idak nia komisaun“, Prezidente PN interinu ne’e liu husi plenária, Segunda (26-10-2020).
Hafoin baixa proposta lei númeru 23/V (3) OJE tinan 2021 liu husi plenária, Luis, husu ba Prezidente Komisaun sira iha PN atu halo ida-idak nia servisu, nune’e prosesu audénsia ho kada ministériu bele la’o ona.
Entretantu proposta lei OJE 2021 ho montante billiaun USD 1.8, Governu aprezenta ho pedidu normal ba PN, iha loron 15, fulan ne’e. Husi númeru ne’e kompostu husi saláriu vensimentu tokon USD 200 resin, bens servisu tokon USD 400 liu, transferénsia públika tokon USD 600 resin, kapitál menor tokon USD 61 no kapital dezenvolvimentu tokon USD 500 resin. ety
