Reseitas FP tun, tinan oin Governu sei halo perfurasaun ba mina-matan sanulu

Ministru Petróleu no Mineral (MPM), Víctor da Conceição Soares, hatete, iha tinan oin Governu sei foku liu ba kompromisu sira ne’ebé halo ona iha dezenvolvimentu setór petrolíferu, liu-liu hasa’e produsaun  mina iha tasi-laran no rai-maran.Tanba ne’e iha tinan 2021, Governu sei halo perfurasaun ba mina-matan sanulu.

“Tinan oin, ita hatene ita nia gráfiku Fundu Petrolíferu ne’e tun, entaun atensaun oinsa para atu halo perfurasaun ba postu petróleu sira ne’ebé mak komprometidu ona atu perfurasaun, atu nune’e nia rezultadu produsaun ne’e bele hasa’e fali nia reseita FP ne’ebé mak agora tun ba bei-beik”, MPM ne’e hafoin lansa relatóriu loron 100 iha salaun Timor GAP, Timor Plaza, Sesta (23-10-2020).

Governante ne’e hatete, iha tinan-oin iha rai-laran iha posu mina-matan lima mak komprometidu ona atu halo perfurasaun, enkuantu hanesan mós iha tasi-laran, Governu sei halo perfurasaun ba mina-matan lima. Produsaun mina iha tasi-laran sei responsabiliza husi empreza Brazileira Santos no iha rai-laran sei toma konta husi Timor GAP ho Timor Resources.

“Iha rai-laran nia prosesu la’o hela, sira ba tiha ona iha ne’ebá halo sosializasaun no estudu sira no sira kompleta ona. Ate ita-nia ekipa traballu no tékniku husi Timor GAP sira ba tiha ona Suai, hodi halo sosializasaun ba ita-nia komunidade sira ne’ebé afetadu ne’e no mós ba Same hodi halo sosializasaun no depois tuir halo faze perfurasaun iha primeiru trimestre 2021”, dehan Víctor.

MPM ne’e mós subliña, depois de lei kódigu miñeiru aprovadu Governu mós hakarak halo dezenvolvimentu estrasaun no explorasaun ba fins komersialisasaun atu utiliza iha rai laran no mós exporta ba liur.

Governante ne’e fiar katak, ho ida ne’e mak bele garante retornu ida ne’ebé sustentável iha longu prazu. oct