VMF informa progresu livru orsamentu 2021 ba PM

Vise Ministra Finansas (VMF), Sara Lobo Brites, hateten, ekipa tékniku husi Ministériu Finansas (MF) no Unidade Planeamentu Monitorizasaun no Avaliasaun (UPMA) halo hela preparasaun ba livru Orsamentu Jerál Estadu (OJE) ba tinan 2021.

“Enkontru semanál ho señór Primeiru Ministru (PM) atu update kona-bá progressu preparasaun livru orsamentu tékniku sira servisu durante fim da semana, Finansas ho UPMA servisu hamutuk hela bele apresa hodi bele entrega ba Parlamentu Nasionál (PN) molok fulan ne’e remata, ami promete semana rua, fim de Outobro ita sei entrega”, VMF ne’e iha Palásiu Governu, Segunda (19/10/2020).

Governante ne’e hatutan, Primeiru Ministru (PM), Taur Matan Ruak, mós fó orientasaun sei iha enkontru Kuarta (21/10) lorokraik, depois de Konsellu Ministru (KM) iha enkontru ho ministru sira hotu, PM no UPMA nia parte bele halo aprezentasaun ba membru Governu hotu kona-bá orsamentu ne’ebé mak tinan ne’e Governu aprezenta pur programa.

“Ideia ne’e PM hakarak membru Governu sira intende estrutura orsamentu ne’ebé mak foin dau-dauk ita aprezenta ba iha PN”, tenik Sara Lobo.

Nia subliña liu tan, sira simu mós orientasaun husi PM kona-bá ohin (20/10) MF hamutuk ho Ministériu Solidariedade Sosiál no Inkluzaun (MSSI), Ministériu Saúde (MS) no Ministériu Koordenadór Asuntu Ekonomia (MKAE), akompaña husi Ministru Prezidénsia Konsellu Ministru (MPKM) sei ba PN, hodi halo aprezentasaun kona-bá estabilizasaun ekonómika. Cin