Atribui kupon sesta bázika iha Díli, MTCI sei servisu ho TIC Timor.IP

Vise Ministru Turismo Comércio e Indústria (MTCI), Domingos Lopes “Antunes”, hateten, distribuisaun kupon ba benefisiáriu sira iha kapitál Díli, MTCI sei servisu hamutuk ho Tecnologia de Informacão e Comunicação Timor Instituto Público (TIC Timor. IP), nune’e fasíl ba Governu atu halo kontrolu liu-liu númeru reklamasaun no mós númeru dupla.

Atribuisaun kupon ho montante USD 50 kada benefisiáriu, MTCI sei realiza iha tempu badak, tanba dau-daun ne’e iha hela prosesu.

“Esforsu agora la’o hela ba voucher nian ne’e ami sei halo hela, ami servisu hamutuk ho TIC Timor iha Gabinete Primeiru Ministru nia- okos atu haree parte IT nian, atu haree uza teknolójia ida ke di’ak para fasilita transaksaun, para evita problema barak-barak hanesan duplikasaun mai ema karik, halo transaksaun atu nune’e ami iha kapasidade atu identifika, atu nune’e asegura ema hotu bele hetan ninia direitu preparativu la’o hela, ami halo koordenasaun ho TIC Timor no parseiru dezenvolvimentu hanesan WFP mós ajuda”, Vise Ministru MTCI ne’e iha Hera-Díli, Segunda (09/11/2020).

Programa sesta bázika Governu lansa ona iha Sesta, loron 27, fulan Outubru liu ba, iha postu administrativu Metinaro, munisípiu Díli.

Rekuperasaun ekonómika ne’ebé Governu implementa liu husi programa fahe nesesidade bázika kada ema ida, hala’o ona iha kapitál Díli, munisípiu Covalima no Bobonaro.

Domingos garante katak, ho atribuisaun sasan bázika ba kada ema, durante fulan rua sei finaliza iha fulan Dezembru.

Tipu nesesidade bázika ne’ebé Governu fahe ba kada ema mak hanesan foos, mina, susu-been, fore-rai, fore-mungu, manu-tolun, manu, batar, koto, kafe no seluk tan. ina