Fundu Petróleu sa’e ba billiaun USD 18,47

Tuir relatóriu trimestral Fundu Petrolíferu (FP) Timor-Leste hahú husi loron 1, fulan Jullu to’o loron 30, fulan Setembru, tinan ne’e, sa’e ba billiaun USD 18,47 kompara ho trimestre dahuluk ne’ebé ho montante USD 18,07.

Vise Governadór Banco Central de Timor-Leste (BCTL), Venancio Alves Maria, hateten, total reseita ne’ebé simu iha trimestre ne’e hamutuk millaun USD 43,53 ne’ebé kompostu husi kontribuisaun sira ba FP hamutuk millaun USD 31,48 no pagamentu royalty simu husi Autoridade Nasionál Petróleu (ANP) hamutuk millaun USD 12,05.

“Osan sira ne’ebé sai durante trimestre ida ne’e millaun USD 172,26 kompostu husi millaun USD 169,50 transfere ba orsamentu Estadu tuir rekezitu Ministériu Finansas (MF) no millaun USD 2,76 kobre kustu jestaun, rendimentu portofoliu em termus de persentajen 2,90% kompara ho refererensia 2,99% ba trimestre ida ne’e”, Vise Governadór BCTL ne’e iha edifísiu BCTL Acait-Díli, Segunda (09-11-2020).

Tékniku Investimentu BCTL, Agostinho Maia mós esplika, investimentu FP ba trimestre ida ne’e hatudu rezultadu pozitivu, tanba ekonomia global kontinua rekupera.

“Investimentu fundu pozitivu, tanba iha períodu Jullu to’o Setembru atividade ekonomia global kontinua rekupera hafoin paradu total, maibé rekuperasaun ne’e menus husi espetativa, tanba pandemia kontinua la’o iha mundu no seidauk iha solusaun permanente”, esplika Tékniku Investimentu BCTL ne’e.

Agostinho subliña, rekuperasaun maka’as iha setór manufaktura, maibé setór servisu sei menus, tanba nasaun barak aplika medida restrisaun prevene pandémia COVID-19, fatór seluk mak banku sentrál prinsipál kontinua mantein taxa de juro besik 0.

Fatór ikus mak Governu barak iha mundu kontinua aplika polítika fiskal ajuda traballadór ne’ebé lakon servisu no negosiante barak ne’ebé lakon rendimentu, hodi fó redusaun taxa no kreditu ho kustu ki’ik hodi bele moris.

Husi relatóriu ne’e hatudu total lukru husi FP hahú Janeiru to’o Setembru tinan ne’e hamutuk billiaun USD 906,77 no ba rendimentu husi investimentu FP hamutuk millaun USD 521,06. ida