JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

PN hahú diskute OJE 2021 billiaun USD 1.895, PM Taur: Sei fó resposta ba dezafiu sira

PN hahú diskute OJE 2021 billiaun USD 1.895, PM Taur: Sei fó resposta ba dezafiu sira

Deputadu Kinta Lejislatura Parlamentu Nasionál (PN) iha Segunda (30/11/2020) hahú  diskute proposta Orsamentu Jerál Estadu (OJE) ba tinan 2021 ho montante USD billiaun 1.895 iha faze jeneralidade.

Tuir ajenda diskusaun iha faze jeneralidade ne’e sei hala’o durante loron tolu, hahú husi loron 30, fulan Novembru to’o loron 2, fulan Dezembru.

Iha abertura diskusaun proposta OJE 2021, Prezidente Parlamentu Nasionál (PPN), Aniceto Guterres Lopes, hateten, diskusaun OJE 2021 ne’e la hanesan ho diskusaun tinan rua ba kotuk, tanba iha faze normal no programadu.

“OJE ne’e ran ba Estadu ne’e, tanba ne’e ohin PN hahú ezerse duni nia kompeténsia konstitusionál, hodi diskute no aprova proposta OJE ba tinan 2021, ne’ebé Governu mak elabora no aprezenta ona mai iha PN dezde 15 de Outubro, tinan 2020 ne’e. Proposta OJE 2021 ne’ebé ohin hahú diskute ne’e la hanesan ho OJE tinan anteriór sira, tanba orsamentu ne’e ho modelu no abordajen diferente, mak orsamentu pur programa, tanba ne’e presiza PN hamutuk ho Governu atu haree no tetu di-di’ak liu husi diskusaun kle’an, diskusaun franku, abertu no ho dignidade, antes OJE ne’e hetan aprovasaun ikus nian”, afirma PPN ne’e iha faze dahuluk diskute OJE 2021.

Aniceto mós apela ba deputadu hotu atu diskute orsamentu ho sériedade no kle’an, nune’e bele foti desizaun ne’ebé garante povu Timor-Leste nia esperansa.

“Deputadu sira mai ita kumpre ita-nia dever konstitusionál nu’udár lejisladór no hala’o responsabilidade perante povu Timor-Leste ne’ebé ita hotu reprezenta, hodi garante Estadu ne’e atu la’o ba oin, hadi’ak no haburas ekonomia no lori esperansa ba dezenvolvimentu ba ita-nia rain, Estadu no povu tomak hein ita-nia desizaun”, tenik Xefe Órgaun Lejislativu ne’e.

Tuir ajenda, proposta OJE tinan 2021 ne’ebé VIII Governu Konstitusional propoin USD billiaun 1.895, ne’e sei diskute no aprova finál globál iha loron 17, fulan Dezembru, tinan ne’e.

PM Taur: Sei fó resposta ba dezafiu sira

Nune’e mos, Primeiru Ministru (PM), Taur Matan Ruak, hateten, bainhira Orsamentu Jerál Estadu (OJE) tinan 2021 aprovadu, sei responde dezafiu hirak ne’ebé akontese iha tinan 2020.

Afirmasaun ne’e Xefe Governu, hato’o bainhira hala’o diskusaun ba proposta lei OJE 2021 iha faze jeneralidade iha Parlamentu Nasionál (PN), iha loron 30, fulan Novembru ne’e.

“Ida-ne’e hanesan Orsamentu Estadu nian ne’ebé ita-nia nasaun propoin atu bele hetan aprovasaun ne’ebé dezenvolvidu atu fó resposta ba dezafiu sira ne’ebé mak antes ne’e nunka mosu, ne’ebé ita-nia nasaun ne’e hasoru iha tinan 2020 nia-laran, ha’u-nia Governu formula orsamentu ne’e atu revitaliza ita-nia ekonomia, proteje no investe iha ita-nia povu no fó ba ita-nia joven sira oportunidade hodi integra iha sosiedade nia le’et atu realiza sira-nia mehi”, dehan Xefe Governu ne’e iha PN.

PM Taur, hatutan, dokumentasaun ne’e inklui livru orsamentu nian hamutuk 9 la hanesan, ne’ebé hamutuk sai pájina besik 1.500 no deskreve despeza planeada sira husi entidade oin-oin hamutuk 91. Ministériu, Sekretaria Estadu no Instituisaun Públika, atividade 1.800 resin la hanesan mak orsamenta ona.

“Formatu husi orsamentu tinan ida-ne’e nian muda maka’as, tanba ita adota ba dala uluk abordajen orsamentál ida ne’ebé bazeia ba programa, ida-ne’e sei garante baze ida ba jestaun ida-ne’ebé di’ak husi ita-nia rezultadu sira no dezempeñu no atu aloka ho forma ne’ebé efisiente liu tan ita-nia rekursu públiku sira-ne’ebé uitoan de’it, tantu agora no mós abanbainrua”, tenik Xefe Governu ne’e.

Líder Ezekutivu ne’e subliña, iha tinan 2020 nasaun ida ne’e aprende buat barak, ih área oi-oin.

“Ita aprende barak husi ita-nia esperiénsia iha tinan 2020, ita aprende katak ita-nia povu no Estadu reziliente no iha kapasidade, ita aprende katak, ita bele sai inovadór liu tán ita aprende katak ita tenke mantein sensus urjénsia nian ida, karik ita hakarak alkansa buat ida ne’ebé substansiál, ikus liu parese importante liu ita aprende ona katak asaun desiziva presiza rekursu ne’ebé desizivu”, afirma PM Taur.

Nia akresenta, objetivu husi polítika ekonómika Governu nian agora mak aselera rekuperasaun ho nivel apoiu Governamentál ida ne’ebé bo’ot, tanba Timor-Leste hasoru dezafiu oin-oin.

Eis Prezidente Repúblika ne’e informa, dalan ba progresu sei la liu husi mudansa ne’ebé la orientadu loloos no prematura atu to’o ba austeridade orsamentál ne’ebé impede dalan ne’ebé nesesáriu ba rekuperasaun forte, kresimentu reziliente no inkluzivu.

“Governu sei kontinua haluan ninia protesaun ba ema sira, salva empregu sira, sustenta konsumu no estimula atividade setór privadu nian”, subliña Taur. say/cin

Lee hotu :   FM tun ba U$ 15 Billioens, Governu tenki gasta osan ho kuidadu

Add to Comments Here!!!!

error: Content is protected.
Secured By miniOrange
You might also like:
PN ladauk simu relatóriu ezekusaun OJE 2020

Reprezentante povu iha uma fukun Parlamentu Nasionál...

COVID-19 halo atividade edukasaun iha TL paralizadu

FOTO:MedSos Vise Ministru Edukasaun Juventude no...

Implementa Sesta Bázika laloos, MKAE: CAC ho PDHJ tenke monitoriza

Ministru Koordenadór Asuntu Ekonómiku (MKAE), Joaquim...

Close