Semana oin, Governu fahe kupon ba sesta bázika iha Díli

Semana oin, Governu sei fahe kupon ba populasaun sira iha kapitál Díli, hodi foti sesta bázika ne’ebé implementa husi Oitavu Governu Konstitusionál.

Vise Ministru Turizmu Komérsiu no Indústria (MTCI-Sigla Português), Domingos Lopes Antunes, hateten, tempu badak Governu sei distrbui kupon ba populasaun iha kapitál Díli, tanba dau-daun ne’e Governu liu husi MTCI sei estuda hela ninia mekanizmu.

Mekanizmu ne’ebé Governu sei uza mak benefisiáriu sira ne’ebé sei simu kupon tenke tama iha sistema, nune’e labele mosu simu dupla no reklamasaun.

Alende iha kapitál Díli Governu mós sei fahe kupon ba benefiasiáriu sira iha munisípiu Liquiça, tanba munisípiu refere suku barak mak besik villa no besik loja.

Maske nune’e, ba munisípiu sira seluk sei responsabiliza husi Ministériu Agrikultura no Peska (MAP) no Sekretaria Estadu Kooperativa (SEKoop).

“Ami tuir kalendáriu semana seluk, semana oin, maibé sei estuda hela mekanizmu sobre ba sistema elektróniku para atu kontrola, Díli ita sei lansa iha tempu badak, sei introduz de’it ba loja sira ne’ebé ema hotu koñese atu ba fatin ne’ebé iha, ami sei deside iha tempu badak, tanba sei iha prosesu, agora seidauk iha data loloos, maibé iha semana dentru data dentru 11 no 12 to’o 16 Novembru ne’e bele hahú ona lansamentu iha Díli laran sobre voucher ne’e”, Vise MTCI ne’e iha Metinaro foin la-lais ne’e.

Hafoin Governu fahe kupon ba benefisiáriu sira, sei ba foti sasan iha loja 10 resin ne’ebé dau-daun ne’e Governu halo ona kontratu ho loja hirak ne’ebé hetan kontratu hanesan Leader, Dílimart no seluk tan. Ina