SERVE rejista kompañia 120 taka atividade

Diretór Ezekutivu Serviço de Registo e Verificação Empresarial (SERVE), Florêncio Sanches, hateten, durante iha períodu COVID-19 SERVE rejista kompañia ne’ebé taka sira-nia atividade hamutuk 100 resin.

“Agora dau-dauk pedidu tama atus ida, tanba loro-loron ita bele simu kompañia  ida to rua ou liu, maibé sira ne’ebé hatama pedidu la hanesan ho sira ne’ebé vervalmente husu, sira ne’ebe mai husu ho vervalmente ha’u hatete hanesan ne’e, lalika taka kompañia sé bele taka atividade, taka kompañia mate ona, ne’e nunka atu moris fila-fali, mezmu sira estranjeiru hakarak taka, SERVE verifika nafatin hodi labele taka, tanba iha tinan 5 to tinan 10 liu ba sira mós kontribui ona ba kofre Estadu liu husi tributária, taxa ne’ebe mak SERVE rekolla hodi nune’e balun taka de’it ninia atividade”, Diretór Ezekutivu SERVE hato’o lia hirak ne’e bainhira halo entrevista iha edifisiu GMN, Sesta (06/10/2020).

Florêncio subliña, wainhira kompañia hirak ne’ebé taka ona lisensa iha SERVE, labele loke fali, tanba hakerek ona iha decreto lei Comerciais 10/2017, hateten,  kompañia ne’ebé mate labele loke ona, maibé na’in ba kompañia bele loke fila fali kompañia foun, nune’e mós aplika ba kompañia internasionál sira.

“To’o ohin loron iha kompañia nasionál hamutuk 100 resin, internasionál hamutuk 20 taka ona sira-nia lisensa, tanba kompañia hirak ne’e labele hetan rendimentu, tanba impaktu husi situasaun COVID-19”, tenik nia.

Diretór ezekutivu SERVE ne’e hatutan,  husi kompañia ne’ebe taka ona lisensa iha SERVE, fó impaktu boot tebes ba traballadór sira ne’ebé durante ne’e servisu iha kompañia refere.

“Ita ezemplu  hanesan supermerkadu Kmanek ne’ebé durante ne’e agrikultór sira fornese hela modo ka ai-han balun ne’ebe bele fa’an, ne’e impaktu boot la halimar katak, rendimentu ne’ebé ha’u iha atu taka fila-fali kustu operasionál la to’o tiha ona, nune’e tenke taka lisensa iha SERVE”, realsa Florêncio.

Tuir Dadus akumulativu husi SERVE, hahú husi fulan Maiu, tinan 2013 to’o ohin loron kompañia hamutuk 30.000, husi númeru ne’e kompañia internasionál hamutuk 100 resin. niv