VMF Sara: Saláriu ba funsionáriu fulan Novembru tama tarde

Vise Ministra Finansa (VMF), Sara Lobo Brites, subliña, pagamentu saláriu ba ajente administrasaun públika ba fulan Novembru nian tarde, tanba sei atualiza dadús liga ho funsionáriu sira ne’ebé halo servisu ho oras extra (Over Time).

“Ko’alia mós ho Primeiru Ministru (PM) kona-bá pagamentu saláriu ne’ebé mak iha fulan antes ne’e ita sempre selu sedu, entre dia 20 no 21, maibé iha fulan Novembru atraza uitoan, tanba sei atualiza dadús hotu ne’ebé mak direitu ema nian hanesan retorativu, over time no promosaun, ida ne’e mak kontribui ba atrazu”, VMF ne’e iha Palásiu Governu, Segunda (23/11/2020).

Governante ne’e subliña, loloos ohin ne’e ema ida-idak bele asesu ona ba nia konta hodi foti osan, maibé presiza tan loron rua ka tolu sira bele asesu sira-nia saláriu.

“Maibé semana ida ne’e nia-laran funsionáriu sira bele asesu ona ba saláriu, mais ou menus iha loron 24 ou 25, ne’e ba funsionáriu permanente no funsionáriu kontratadu sira”, tenik Sara Lobo.

Nia informa mós, iha Sesta semana kotuk ne’e halo ona pagamentu ba ministériu balun, tanba ministériu ne’ebé laiha problema maibé iha ministériu ida ka rua ne’ebé iha problema ho sira-nia orsamentu presiza rezolve. cin