Governu simu invoice tarde husi kompañia implika ezekusaun OJE 2020 atraza

Ezekusaun Orsamentu Jerál Estadu (OJE) tinan 2020 la’o atraza, tanba empreza hatama invoice tarde ba Governu.

“Ezekusaun OJE 2020 la’o hela, agora fundu COVID-19 kontinua ezekuta nafatin, ita espera katak, bele ezekuta por volta 80% ou 85% tinan ida ne’e, ita haree katak, iha buat balun atraza uitoan, dalabarak ita depende ba invoice sira ne’ebé husi empreza sira hatama tarde, sé sira hatama tarde para ita labele iha tusan, hakarak ka lakohi ita tenke selu agora”, Ministru Finansa (MF), Rui Gomes ba jornalista sira iha Palásiu Governu, Segunda (14/12/2020).

Governante ne’e afirma, hakarak ka lakohi iha loron 31, fulan Dezembru taka kontas, depois tenke muda ba tinan oin, ne’e hanesan tusan ona, tanba osan ne’e labele tranzita ba tinan oin, tantu ida ne’e mak problema.

“Atrazu tanba empreza sira seidauk hatama sira-nia invoice, kuandu seidauk hatama invoice ita labele prosesa, ida ne’e mak han tempu uitoan, invoice kona-bá servisu sira ne’ebé mak sira halo”, tenik Rui Gomes.

Tuir MF, kona-bá OJE 2021 ne’ebé pasa iha Parlamentu Nasionál, hodi fó dalan ba Governu rekupera ekonomia rai-laran.

“Enkontru ho Primeiru Ministru (PM) ko’alia kona-bá saída mak akontese iha Parlamentu, tanba ita hotu hatene katak, ita-nia OJE 2021 pasa ho votus a favor 44. Ida ne’e buat ida ne’ebé di’ak tebes fó inspira konfiansa husi setór privadu, ajente ekonómiku no sosiedade, atu Governu iha marjen atu bele hahú rekupera ekonomia ba oin”, nia akresenta.

OJE 2021 aprovadu iha loron (12/12/2020), iha Parlamentu Nasionál ho votus a favor  44, kontra 0, abstensaun 0. cin