Kada tinan BCTL simu relatóriu transaksaun suspeita brankeamentu kapitál 100

Diretora Ezekutiva Unidade Informasaun Finanseira (UIF), Banco Central de Timor-Leste (BCTL), Maria de Jesus Sarmento, informa, kada tinan sira sempre simu relatóriu transaksaun suspeita brankeamentu kapitál 100 resin, maibé husi rezultadu análiza ba relatóriu sira ne’e balun de’it mak iha rejistu kriminál.

“Ema ida tenke komete uluk krime orijin ida, ka hasees-an husi obrigasaun atu selu impostu, nia komete tiha krime hanesan ne’e, nia tenta atu subar orijin husi osan fo’er ida ne’e, osan ne’ebé nia obtain de forma ilegál ka ilísitu. Entaun nia tenta atu subar orijin husi osan ne’ebé nia hetan husi atividade kriminál ida ne’e, entaun nia tenta atu koloka iha sistema finanseiru ou kria konta ida ka rua. Depois tuir fali segundu mak nia kria tan konta oi-oin. Kona-bá kazu brankeamentu kapitál ne’ebé ke Timor-oan rasik ka ema estranjeiru sira komete ne’e iha barak ona, balun hetan ona desizaun tribunál no balun iha prosesu. Relatóriu ne’ebé ami simu tinan ida husi 100 ba 200, maibé ami komunika la to’o 50”, Diretora Ezekutiva UIF BCTL ne’e hafoin remata asina protokolu kooperasaun ho Direcção Geral Serviços Registo Notariado (DGSRN) iha salaun auditóriu Ministériu Justisa, Caicoli-Díli, Kinta (17/12/2020).

Nia subliña, krime brankeamentu kapitál mak hanesan autór ka pesoál balun ne’ebé komete uluk krime korupsaun, fraude fiskál no seluk tan, ne’ebé ikus mai tenta subar no rai osan hirak ne’e iha sistema finanseiru privadu.

Entretantu Diretora Ezekutiva UIF BCTL ne’e subliña, kona-bá dadus loloos ba kazu sira ne’e la’ós UIF nian, maibé ne’e Ministériu Públiku (MP) nia kompeténsia, tanba UIF halo de’it investigasaun liu husi análiza ba relatóriu ne’ebé iha no ikus mai rezultadu sei submete ba autoridade judisiáriu. san