JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Komisaun C submete ona OJE 2021 ba PPN

Komisaun C submete ona OJE 2021 ba PPN

Parlamentu Nasionál (PN) liu husi Komisaun C ne’ebé trata asuntu finansa públika konklui ona redasaun finál Orsamentu Jerál Estadu (OJE) tinan 2021 no entrega ona ba Prezidente Parlamentu Nasionál (PN), Aniceto Guterres.

“Ita hotu hatene tuir rejimentu hafoin halo aprovasaun finál globál iha plenária komisaun C halo redasaun finál ba proposta lei ne’e. Ohin ami konklui halo redasaun finál iha mós prezensa husi Vise Ministra Finansa ho tékniku no deputadu sira ne’ebé tama iha komisaun C atu halo redasaun finál, ami konklui ho votus a favor 8, kontra 0 abstensaun 0, hafoin ami haruka ba PPN, PPN sei haruka ba Prezidente Repúblika (PR). Agora ami konklui, ami asina, ami entrega ba PPN atu haruka ba PR ne’e kompeténsia PPN nian”, Prezidente komisaun C, Maria Angelica dos Reis ba jornalista sira hafoin konklui redasaun finál OJE 2021 PN, Segunda (14-12-2020).

Deputada bankada FRETILIN ne’e hateten, kona-bá bainhira mak atu lori ba PR ne’e kompeténsia PPN nian, tanba komisaun C nia kompeténsia mak konklui redasaun finál OJE 2021.

Tuir nia, kona-bá bankada CNRT auzente iha diskusaun OJE faze espesialidade ne’e desizaun partidu nian, maske OJE 2021 errata barak.

“Kona-bá deputadu bankada CNRT ita hotu hatene katak durante ne’e sira la tuir debate tanba sira-nia desizaun polítika ohin la marka prezensa deputadu na’in rua, maibé sira iha justifikasaun, tanba moras no servisu polítiku. OJE 2021 Governu introduz orsamentu pur programa maske durante debate bankada opozisaun auzente, deputadu bankada apoiu Governu mós halo kritika ba Governu kona-bá orsamentu ne’ebé mai ho errata barak. Ida ne’e ami-nia servisu atu halo, tenke hadi’a nune’e to’o ikus Governu bele implementa orsamentu ne’e“, dehan Maria Angelica.

Xefe bankada CNRT, Duarte Nunes, hateten, maske bankada CNRT auzente iha debate OJE 2021 iha faze espesialidade, maibé bankada CNRT iha obrigasaun atu akompaña Governu halo ezekusaun ba orsamentu ne’e.

“Embora ami la partisipa nu’udár reprezentante povu ami iha obrigasaun nafatin atu akompaña nia ezekusaun ida ne’e, importante foti ona osan povu nian uza tenke tuir regra, ami sei akompaña, ami promete ba povu ami hamri’ik nafatin iha povu nia sorin, sira implementa tuir regra povu hetan benefísiu ou la’e, ami-nia obrigasaun no ami nia dever atu hala’o kna’ar ida ne’e hanesan deputadu. Bankada CNRT halo fiskalizasaun, tanba nu’udár deputadu atu akompaña, tanba OJE 2021 orsamentu pur programa hodi bele akompaña programa refere”, tenik Duarte.

PN aprova lei OJE 2021 ho votus a favor 44, kontra 0 no abstensaun 0, maibé bankada CNRT auzente iha faze espesialidade no partisipa de’it iha faze jeneralidade, maibé la fó votus. ety

Lee hotu :   PM seidauk simu karta husi Banco Federal América

Add to Comments Here!!!!

error: Content is protected.
Secured By miniOrange
You might also like:
Estadu presiza rekoñese Amu Belo nia sakrifísiu ba nasaun

Timor-Leste selebra tan rekoñesimentu nível mundiál...

Reklamante subsídiu família husi Comoro keixa MSSI ba Parlamentu Nasional

Reklamante ba subsídiu uma kain USD...

Governu simu invoice tarde husi kompañia implika ezekusaun OJE 2020 atraza

Ezekusaun Orsamentu Jerál Estadu (OJE) tinan...

Close