OJE 2021 billiaun USD 1.895 aprovadu iha jeneralidade

Reprezentante povu iha uma fukun Parlamentu Nasionál (PN) aprova ona proposta Orsamentu Jerál Estadu (OJE) tinan 2021 iha faze jeneralidade, hafoin bankada CNRT hato’o deklarasaun polítika no husik hela plenária hodi la fó votu ba OJE 2021.

Maske bankada CNRT la fó votu ba OJE 2021, maibé OJE 2021 pasa ho votu a favor  44, kontra 0 no abstensaun 0.

Vise Xefe bankada CNRT, Patrocínio Fernandes, hateten, CNRT sei konsistente ho prinsípiu katak legalidade mak baze fundamentál atu hametin Estadu Direitu Demokrátiku.

“Bazeia ba hanoin ida ne’e, bankada CNRT seidauk rekoñese VIII Governu viabilizadu ida ne’e. Ami VIII Governu la eziste ona mak laiha fatin aprezenta proposta OJE ida ne’e. Pozisaun ne’e ami hatudu ona iha debate OJE 2020 liu ba. Karik uluk kedan hamosu IX Governu Konstitusionál dalaruma situasaun bele diferente”, Deputadu bankada CNRT ne’e liu husi deklarasaun polítika iha PN, Kuarta (02-12-2020).

Maske nune’e, hanesan reprezentante povu atu garante utilizasaun osan públiku nian tuir lei deputadu CNRT konsiente ba nia responsabilidade tomak, hodi ativamente kontribui ba iha prosesu audiénsia to’o iha debate iha sesaun jeneralidade ida ne’e.

Kompara ho OJE 2020 nian proposta OJE 2021 ida ne’e sa’e 27%, iha aumenta USD millaun 406. Aumenta osan la reflete ho kapasidade ezekusaun Governu nian, tanba atu remata tinan fiskál (loron 30 fulan, Novembru, tinan 2020) Governu foin ezekuta OJE 2020 hamutuk 61.4%, osan ne’ebé la ezekuta hamutuk USD millaun 479,4 ne’ebé sei transita ba iha OJE 2021. Governu sei rai osan barak iha tezouru ne’ebé nia jurus sei laiha kompara ho osan iha Fundu Petrolíferu (FP) ne’ebé sei fó funan to’o 3%. Bankada CNRT bazeia ba istória kapasidade ezekusaun mak USD 1.2 bilhões to’o USD 1.4 bilhões. Senáriu ida ne’e mak prudente liu no bele proteje ita-nia fundu rezerva ba iha sustentabilidade fiskál. Proposta Projetu Lei (PPL) OJE 2021 nia inkonstitusionalidade seidauk klaru. Iha versaun rua, versaun Komisaun A no versaun komisaun C iha PN. Bankada CNRT hanoin katak versaun rua ne’e mai husi ema jurista ne’ebé intende di’ak tebes linguajen jurídika. Nune’e ita hein desizaun Prezidente Repúblika (PR), hodi haruka ba Tribunál Rekursu (TR) haree situasaun ne’e”, klarifika Patrocínio.

Tuir bankada CNRT nia análiza, halo ona leitura ba relatóriu paraser komisaun C nian no ikus mós rona intervensaun Primeiru Ministru (PM). Iha loron tolu nia-laran deputadu bankada CNRT halo mós intervensaun hodi hato’o kestaun no preokupasaun barak hanesan povu tomak akompaña iha loron tolu ne’e nia-laran.

“VIII Governu  viabilizadu  ida ne’e hanoin katak, sei bele halo buat hotu-hotu iha tinan 1-2 nia-laran. Intensaun ne’e ita bele haree husi OJE 2020 ne’ebé ho Dotasaun Orsamentu Temporáriu (DOT) de’it mós nia ezekusaun fraku, maibé obriga-an atu jere tan osan liu USD billiaun 2 ne’e akontese, tanba Governu la sukat nia kapasidade ezekusaun orsamentu, enkuantu jere de’it DOT mós foin liu 60%; kapasidade loloos Governu mak USD 1.2 bilhões to’o USD 1.4 bilhões de’it, foti osan boot atu gasta, maibé ignora tiha sustentabilidade fiskál. Osan hotu tiha, osan mai fali husi ne’ebé?”, dehan Vise Xefe bankada CNRT ne’e.

Xefe bankada FRETILIN, Francisco Miranda Branco, hateten, OJE 2021 momentu importante ba Estadu nia vida, tanba ne’e la importante ba CNRT atu husik hela plenária.

“Liu tiha tinan tolu resin ita-nia Estadu la’o de’it ho DOT ne’ebé provoka resesaun ekonómika no afeita ba ita-nia povu nia moris, tanba ne’e  bankada FRETILIN louva no valoriza tebes Estadu no povu nia maturidade no nia kapasidade reziliénsia hasoru krize ekonomia iha rai-laran durante tinan tolu resin, tanba de’it CNRT buka halimar konfiansa ne’ebé povu depozita ba sira liu husi eleisaun hodi hamonu Governu iha tinan 2017, forma Governu iha tinan 2018 koko hamonu hikas Governu. Ho prátika golpe no provoka krize susesivamente hamonu Governu bei-beik la lori prospriedade, maibé lori ita-nia sosiedade sai frazíl no haterus ita-nia povu no ita-nia Estadu“, tenik Branco.

Alende ne’e, Xefe bankada PD, António da Conceição “Kalohan”, hateten, impase polítiku iha rai-laran paradu no pandemia COVID-19 hatodan tan krize no  halo atividade ekonómika la’o hakdasak to’o ohin loron.

“Proposta OJE 2021 hamutuk USD billiaun 1.895 ne’ebé tuir proposta Governu atu hakbi’it Governu hala’o kna’ar ukun, hodi hala’o dezenvolvimentu ba ita-nia rai, tanba ne’e bankada PD kongratula Governu bele halo orsamentu ida ho pur programa aprosimasaun ida di’ak hodi haree valór osan atividade real ne’ebé ministériu ida-idak halo médotu di’ak atu Governu halo nia ezekusaun ho rigor tuir atividade ne’ebe ministériu no Sekretaria Estadu no Instituisaun Autónoma sira halo  no mós fasilita ami deputadu sira hala’o kna’ar fiskalizasaun orientadu ba saída mak Governu halo”, tenik Kalohan.

Tuir planu, PN sei kontinua debate proposta OJE 2021 iha faze espesiliadade, iha loron 4, fulan Dezembru to’o remata. ety

Leave a Reply

Your email address will not be published. Required fields are marked *