Governu aprova ezekusaun OJE 2021

Governu liu husi enkontru extraordináriu Konsellu Ministru (KM) aprova ona projetu dekretu Governu kona-bá ezekusaun Orsamentu Jerál Estadu (OJE) tinan 2021 ho montante USD millaun 1.377,6.

Dekretu Governu ida ne’e hatu’ur regra sira kona-bá ezekusaun OJE ne’ebé hetan aprovasaun husi lei númeru 14/2020, loron 29, fulan Dezembru no aplika ba orsamentu sira iha órgaun no servisu sira husi administrasaun sentrál, Rejiaun Administrativa Espesiál Oe-Cusse Ambeno no seguransa sosiál.

“KM aprova projetu dekretu Governu nian kona-bá ezekusaun OJE 2021, lei OJE 2021 tama ona no vigor iha dia 1 de Janeiro no ho aprovasaun ida ne’e, Segunda (11/01) agora ezekusaun bele la’o no sistema sira konforme husi Ministériu Finansa (MF) hato’o ona, nune’e bele hahú ona prosesu pagamentu sira finansa nian seluk, osan ne’e hein MF hato’o ba Banco Central, depois mak husu ba Banku Federal haruka, tanba Governu iha ona autorizasaun. Diploma ida ne’e hakarak fó garantia ba efetivu no rigorozu kontrolu orsamentál no ba tempu hanesan, hodi simplifika prosedimentu sira ezekusaun orsamentál nian ne’ebé fó kontinuidade ba mudansa sira ne’ebé hahú ona iha tinan 2020 ho objetivu atu fasilita ezekusaun OJE 2021 husi órgaun no servisu sira setór públiku administrativu nian”, Ministru Prezidénsia Konsellu Ministru (MPKM), Fidelis Manuel Leite Magalhães hafoin remata enkontru extradordináriu KM iha Palaçio do Governo, Sesta (08-01-2021).

Nia esplika, entre diferensa sira ba Dekretu Governu husi ezekusaun ba OJE 2020 destaka katak, eziste de’it rejime finanseiru rua, inklui implementasaun husi orsamentu liu husi programa sira, halo alterasaun ba data husi taka ezersísiu orsamentál, aumenta fleksibilizasaun husi ezekusaun orsamentál no aumentu obrigasaun, hodi fahe informasaun kona-bá ezekusaun.

OJE ne’e rasik hetan promulgasuan husi Prezidente Repúblika (PR), Francisco Guterres “Lú Olo”, iha loron 28, fulan Dezembru, tinan 2020, ho Dekretu Parlamentu Nasionál (PN) númeru 26/V OJE 2021.

Tuir Governante ne’e, OJE tinan 2021 hamosu alterasaun metodolójika balun ne’ebé halo indikasaun kona-bá despeza sira tuir programa ida-idak nian, alendé utiliza klasifikasaun orgánika (entidade ne’ebé mak atu realiza despeza) no klasifikasaun ekonómika (tipu despeza ne’ebé mak atu realiza).

Durante tinan 2021 Governu hetan autorizasaun atu realiza transferénsia husi Fundu Petrolíferu (FP) to’o montante USD millaun 1.377,6.

Entretantu PN aprova dekretu númeru 26/V OJE 2021, ho votu a favór 44, laiha votu kontra no laiha abstensaun, iha loron 12, fulan Dezembru, tinan 2020. ida