MF-RAEOA asina protokolu transferénsia osan

Ministériu Finansa (MF) hamutuk ho autoridade Rejiaun Administrativa Espesiál Oe-Cusse Ambeno (RAEOA) halo lansamentu ba utilizasaun Sistema Integradu Informasaun Jestaun Finanseira ou Government Resource Planning (GRP), oinsa fasilita servisu RAEOA hodi halo ezekusaun ba orsamentu. Alende ne’e MF ho autoridade RAEOA mós asina protokolu intendimentu kona-bá transferénsia orsamentu ba konta RAEOA.

Ministru Finansa, Rui Gomes, hateten, total orsamentu ne’ebé sei transfere ba konta RAEOA iha tinan 2021 hamutuk USD 29,243 ne’ebé sei transfere kada fulan 3 ho montante USD 7,310.75, enkuantu saldo jerénsia iha RAEOA nia konta rasik husi tinan anteriór hamutuk USD 97.757.

“Lansa sistema integradu ne’ebé uza iha administrasuan sentrál no autoridade RAEOA mak sei uza, sistema nia komponente iha barak no autoridade RAEOA bele asesu ba módulu 7, nia benefísiu mak RAEOA nia gastu sira sei tau iha portál transferénsia no asesu ba públiku mós sei iha no fasilita órgaun soberania iha Parlamentu Nasionál (PN), hodi bele halo fiskalizasaun ba osan ne’ebé sira aprova ona, hodi buka hatene osan ne’e utiliza ba saída”, Governante ne’e iha salaun auditóriu Xanana Gusmão MF, Kinta (21-01-2021).

Prezidente autoridade RAEOA, Arsênio Paixão Bano mós agradese ho kooperasaun ne’ebé la’o ona, nune’e servisu jestaun finanseira iha RAEOA bele integradu liu no bele garante katak, orsamentu ne’ebé hasa’i ona ba duni nesesidae povu.

“Ha’u fiar katak ho kooperasaun ida ne’e Oe-Cusse bele kontinua la’o ba oin no 125 milhões ba 2021 Oe-Cusse tenke ezekuta, ita la terlambat ida no fulan ida (1) ona Adjunta ho Diretór Jerál sira para Oe-Cusse bele hahú implementa akuntabilidade no transparénsia, nune’e USD 1 uza duni ba povu”, tenik Arsênio.

Sistema Integradu Informasaun Jestaun finanseira ou GRP ne’e rasik bele asesu husi públiku, hahú iha loron 22, fulan Janeiru, tinan ne’e. ida