Sesta Bázika oportunidade ba agrikultór hasa’e produsaun

Prezidente Organizasaun Naun Governamentál (ONG) Tane Konsumidór, António Ramos da Silva, hateten, programa sesta bázika ho pakote rekuperasaun ekonómika ne’ebé Governu da-ualu implementa dau-daun ba populasaun hotu iha teritóriu tomak, oinsa fó oportunidade ba agrikultór sira hasa’e produsaun lokál iha Timor-Leste.

Tuir nia, Governu konstituisionál da-ualu deside implementa programa nasional ne’e, tanba surtu COVID-19 ne’ebé sai ameasa ba ema nia vida no fó impaktu ba ekonomia nasionál.

“Sesta Bázika atu produtór sira nafatin hasa’e ninia produsaun, nune’e para ita to’o ona iha faze ida katak ita bele produz ona substitutu ba produsaun ne’ebé ke sempre importa husi liur no ita lori osan ba investe iha liur, ne’e duni to’o ona tempu insentiva ita nia produtór nasional sira, atu produz para hasa’e sira nia kbi’it nune’e sira bele responde mós ba merkadu”, Prezidente ONG Tane Konsumidór ne’e ba GMN iha Vila-Verde, foin lalais ne’e.

Distribuisaun sesta bázika dau-daun ne’e ministériu implementadór sira la’o hela iha kada munisípiu no ba programa sesta bázika ne’e Governu aloka orsamentu ho montante USD tokon 70 resin.

Programa Nasional ne’e Governu oferese sasán bázika ba kada ema, ba fulan Novembru no Dezembru, tinan 2020 ho USD 50, maibé hetan kritika maka’as husi benefisiáriu sira, tanba konsidera la tuir promesa Governu. Ina