BCTL laiha koñesimentu ba osan tau fotografia Xanana

Banco Central de Timor-Leste (BCTL) laiha  koñesimentu ba osan ho valór USD 100 uza fotografia líder nasionál, Kay Rala Xanana Gusmão, ne’ebé dau-daun ne’e espalladu iha Média Sosiál (MédSos).

“Ita Timor-Leste seidauk iha osan rasik, osan ne’ebé mak ita uza ne’e osan dollar Amérika ninian. Ha’u la hatene hosi ne’ebé Banco Central laiha introdus ita-nia osan rasik. Ha’u la hatene. Ema kreativu balun mak halo hanesan ne’e”, Governadór BCTL, Abrão de Vasconcelos ba jornalista sira Sesta (12/02/2021), iha otél Novo Turismo.

Abrão de Vasconcelos, husu ba PNTL atu loke prosesu investigasaun, maibé nia dehan karik ema balun mak hakarak espresa sira-nia sentimentu kreatividade hodi hatudu ba públiku.

“Sim konserteza halo prosesu investigasaun, mas ema espresa ema nia sentimentu kreatividade hakarak hatudu laiha problema, não ser nia halo 100 dollar ida koor hanesan loos, depois troka fali ema nia oin ba iha gambar”, haktuir Governadór BCTL ne’e.

Alende ne’e, Komandante Jerál Polísia Nasionál Timor-Leste (PNTL), Komisáriu Faustino da Costa, hateten, dau-dauk ne’e ema barak mak matenek, hodi espresa sira-nia kreatividade, hodi halo dezeñu osan, la signifika osan ne’e atu sai legál iha Timor-Leste.

“Kuaze ema matenek barak la halimar que hamosu sira-nia epresa, sira-nia ideas, mas la signifika buat ne’ebé ideas kreativu pesoa ida-idak ninian sai tiha ona legál iha ita-nia rai, ita-nia nasaun”, dehan Faustino.

Entretantu osan ne’e USD 100 ho marka mós logo Banco Central Timor-Leste, ho númeru seri kompletu. avi