JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

BCTL seidauk simu pedidu levantamentu FP

BCTL seidauk simu pedidu levantamentu FP

Governadór Banco Central de Timor-Leste (BCTL), Abrão de Vasconcelos, hateten, Governu seidauk halo pedidu levantamentu ba Fundu Petrolíferu (PF), tanba osan iha kofre Estadu sei iha.

“Tuir esperiénsia ne’ebé iha, Governu nunka halo pedidu levantamentu iha inísiu tinan, maibé normalmente iha tinan klaran, ho nune’e Governu seidauk halo pedidu levantamentu, tanba Governu sei iha osan iha kofre Estadu. Kona-bá informasaun ne’ebé Banku Sentrál Amerika sei la haruka osan mai Timor-Leste ne’e hanesan rumoris. Bai-bain Governu la halo pedidu levantamentu iha fulan Janeiru, Fevereiru, ho fulan Marsu, iha pasadu nunka halo hanesan ne’e, maibé ha’u haree notísia ha’u mós  hakfodak agora foti iha Janeiru, Fevereiru atu halo saída. Maske seidauk halo pedidu levantamentu, normalmente prosesu tékniku kuandu  Governu presiza Ministériu Finansa (MF) haruka karta de’it ba Banku Sentrál, Banku Sentrál ezekuta instrumentu transferénsia laiha buat ida  estrañu ka aneh“, Governadór BCTL ne’e ba jornalista sira iha otél Novo Turismo, Sesta (12-02-2021).

Abrão haktuir, nia parte labele fó sai montante Governu nia osan iha banku, tanba BCTL labele fó saí fali ninia kliente nia númeru osan.

“Kona-bá montante osan, ha’u hanesan iha banku labele hatete fali ha’u nia nasabah nia osan iha banku, ha’u hanesan iha banku sentrál, ami labele atende rumoris balun ne’ebé hakarak peskaria ka memancing de’it, mais laiha problema. Hanesan ita-boot sira nota iha relatóriu trimestrál FP ne’ebé Banku Sentrál públika foin la-lais tinan 2020 halo levantamentu 886 milhões, signifika iha impedimentu Governu atu  hasai osan“, subliña Governadór BCTL ne’e.

Maibé, deputada bankada CNRT, Maria Fernanda Lay, argumenta realidade hatudu katak, funsionáriu barak mak seidauk simu saláriu no Governu seidauk halo pagamentu ba kompañia distribuidór sesta bázika sira.

Tanba ne’e, Governu labele halo konfuzaun ba públiku hodi dehan, osan iha BCTL sei iha.

“Iha politíka uluk ita labele husik kofre mamuk bainhira menus hosi  milhões 200, Governu bele rekorre ba orsamentu Parlamentu Nasionál (PN) foin aprova bainhira iha saldo ne’ebé tranzita hosi 2020, tanba ezekusaun fulan rua de’it Governu tranzita osan boot, nune’e obligasoens ho kompromisu halo ba kompara sasán iha tinan kotuk la ezekuta iha fulan Fevereiru nia laran, sira la entrega sasán ne’ebé iha obligasoens atu selu ne’e. Tanba ne’e ita uza letter of credit hodi taka garantia hanesan ho kompañia sira ho fornesimentu ne’e. Maske nune’e Governu dehan sei iha osan, maibé Governu seidauk halo pagamentu kompañia distribuidór sesta bázika no hasai sirkulasaun hodi ko’a osan 7% hosi ministériu sira, alende ne’e seguransa, liu-liu F-FDTL deve ai-han, foos ho mina durante fulan tolu ona.

Sé Governu iha osan tanba sá mak la selu sesta bázika ne’ebé halo programa hasai 7% husi kada ministériu, problema mak ida ne’e, sé Governu iha osan la presiza foti, ida ne’e mak halo konfuzaun ba públiku. Foin dau-dauk ami iha audénsia iha dívida naun finanseira, asuntu sai preokupasaun mak ne’e sé Governu seidauk presiza osan, nusa halo tusan inísiu primeiru trimestre, Governu mai altera fali orsamentu uluk halo ona 2021 nian, foin hahú tinan sé orsamentu halo rigór orsamentu pur programa, tanba sá iha programa balun osan la tau saldo menus 200 milhões sira bele dada osan ne’e. Ha’u la hatene Governu sei uza rezerva ne’ebé tan to’o Maiu foin dada osan”, tenik Fernanda Lay.

Antes ne’e, iha loron 25, fulan Janeiru, Ministru Finansa, Rui Gomes,  promete, Governu sei halo pedidu levantamentu iha fulan Fevereiru,  maibé iha loron 2, fulan Fevereiru ne’e, Ministériu Finansa hasai sirkulár ida orienta ba kada membru Governu tenke identifika dotasaun orsamentál ho montante pursentu 7, hosi totál orsamentu instituisaun atu transfere ba fundu COVID-19, hodi halo pagamentu ba despeza sesta bázika.

Sirkulasaun ne’e bazeia ba deliberasaun Konsellu Ministru, iha loron 29,   fulan Janeiru, liu hosi proposta Ministru Koordenadór Asuntu Ekonómiku,  Joaquim Amaral no Ministru Finansa, Rui Gomes, kona-bá orientasaun polítika relasiona ho ezekusaun programa Sesta Bázika. ety

Lee hotu :   Akadémiku husu Governu hadia lei saláriu mínimu ba traballadór

Add to Comments Here!!!!

error: Content is protected.
Secured By miniOrange
You might also like:
OMS rekomenda TL uza vasina AstraZeneca

Organizasaun Mundiál Saúde (OMS) rokomenda ba...

Prosesu dada GS mai TL iha faze negosiasaun

Ministru Petróleu no Minerál (MPM), Vítor...

PM husu públiku labele ansi Governu foti OJE husi FP

Primeiru Ministru (PM), Taur Matan Ruak,...

Close