Governu rekoñese foti rezerva kontinjénsia selu saláriu FP

Governu rekoñese ezekusaun Orsamentu Jerál Estadu (OJE) tinan 2019 foti fundu rezerva kontinjénsia, hodi halo pagamentu saláriu desimu terseiru (gaji 13) ba Funsionáriu Públiku (FP) sira.

Vise Ministra Finansa (MF), Sara Lobo Brites, hateten, fundu rezerva kontinjénsia ne’e foti bainhira Governu laiha fonte seluk, entaun rekorre ho kritéria tenke finánsia despeza ne’ebé labele adia tán, rezolve kedas iha tinan fiskál ida.

“Iha situasaun 2019, ita foti duni hosi rezerva kontinjénsia ba iha pagamentu saláriu, ne’e liga liu bá saláriu désimu terseiru (13), tanba ita hatene katak, bainhira ita prepara orsamentu ita la prepara désimu terseiru”, Vise MF ne’e ba jornalista sira iha PN foin la-lais ne’e.

Tuir Sara Lobo, tanba desizaun foti fundu kontinjénsia iha tinan fiskál 2019, ne’e liu hosi reuniaun Konsellu Ministru (KM).

“Ministériu balu iha rezerva atu selu, ita labele sakrifíka fali, ita tenke kobre, nune’e funsionáriu hotu-hotu iha direitu (désimu terseiru 2019), labele fó fali prejuízu ba ema balun, ne’e mak ita rekore ba rezerva kontinjénsia no despeza sira seluk, maibé ne’e desizaun KM. Kona-bá rekomendasaun Câmara de Contas nian Governu sei mellora iha futuru, bainhira ita la uza fundu kontijénsia kuandu ita iha planu ida di’ak liu”, Vise MF ne’e fundamenta.

Antes ne’e, Prezidente Tribunál Rekursu (TR), Deolindo dos Santos, fó-sai katak, foti fundu rezerva kontinjénsia atu finánsia programa ne’ebé la prevé orsamenta, kontra lei. ety