Ró THANH BA husi Índia selu multa ba Alfándega tanba laiha segel

Laiha segel (selo-portugés) husi Ró THANH BA husi India, ne’ebé tula fós tolenada 6.800, ne’ebé sosa hosi Kompañia Perisos, tenke selu multa ba Alfándega ho montante USD 1.300.

“Bainhira Alfándega ba halo inspesaun identifika ró refere nia flate ne’ebé rai fos laiha segel, tanba ne’e Alfándega tenke sujeita ba halo investigasaun”,dehan Diretór Jeral  Autoridade Aduaneira, Jóse António Abilio, ba JN-Diário Tersa (09/03/2020) eis edifísiu Ministériu Finansas, Díli.

Diretór Jeral hatutan, husi investigasaun mak bele hatene tanba saida mak segel laiha, tanba sei segel laiha sira bele halo manobra ruma iha tasi laran.

“Ohin dader, ha’u haruka ekipa jestaun risku halo investigasaun no konklui ona hodi haree ba erro no todan ba sala ne’ebé nia halo, mak Alfándega aplika koima ba ró refere ho montante dolar amerikanu 1.300 no koima ne’e aplika bazeia aktus ne’ebé sira halo”, afirma Jóse Antonio.

Nia hatutan, Ró THANH BA selu ona multa hodi kumpri sira nia devér, tanba ne’e hosi parte Alfándega autoriza ona sira atu halo deskaregamentu.

“Ró THANH BA atraka iha Portu Díli, segunda kalan no Alfándega halo kedas inspesaun mak indentifika ró refere laiha segel, maibé tanba sira selu ona multa entaun agora dau-daun sira hahú halo deskaregamentu”,dehan.Fel