CNRT-PLP mantein oposizaun, oinsa PD ho KHUNTO ?

Lideransa Partido Frente Revolucionária do Timor-Leste Independente (FRETILIN) lidera direitamente husi Sekretariu Jeral Paritdo FRETILIN, Mari Alkatiri, hala’o ona enkontru istoriku ida ho partido sira ne’ebe mak hetan asentu parlamentar,  hodi koalia kona-ba opsaun koligasaun no formasaun governu foun ba periodu 2017-2022. Husi enkontru hirak ne’e, Partido Congresso Nacional Reconstrucção Timorense (CNRT) reafirma ninia pozisaun hakarak sai oposizaun no la partisipa iha VII governu, no Partido Libertasaun Popular (PLP) mos hakarak sai oposizaun, maibe lakohi mos atu akontese eleisaun antisipada. Tamba dialogu FRETILIN ho CNRT ba dala uluk seidauk hetan rezultadu ba formasaun governu, partidu rua ne’e planea atu realiza tan sorumu ba daruak nian iha tempu ne’ebe seidauk determina. Maske nune’e dalan sei nakloke ba partido vensedor atu konversa ho partido sira hotu ne’ebe mak hetan asentu iha Parlamentu Nasionál,  Tuir ajenda, Sesta ohin (11/08) FRETILIN sei enkontru tan ho partidu Demokrátiku (PD) no mós KHUNTO. Ita seidauk hatene pozisaun saida mak partidu rua ne’e sei foti, karik sira hili atu hamutuk ho FRETILIN atu forma governu, ka karik sira hili pozisaun seluk. Pozisaun saida deit mak partidu PD ho KHUNTO hili, ita hotu espera katak desizaun ne’e favorese interese nasaun laos interese partidaria. Sekertariu Jeral Partido FRETILIN, Mari Alkatiri espera katak, negosiasaun ho PLP bele asegura Governasaun FRETILIN to’o tinan lima. Alkatiri dehan, FRETILIN ho PLP sei halo negosiasaun iha PN. “Ha’u kompriende pozisaun PLP nian ne’e, no ami kontenti tanba dehan lakohi eleisaun antisipada,” katak Alkatiri. Rezultadu sorumutu FRETILIN ho CNRT no PLP seidauk hatudu sinal pozitivu ba formasaun VII governu. Buat ida deit mak klaru ona, pelu menus to’o agora: CNRT ho PLP sei sai opozisaun ba tinan lima tuir mai. Agora ita hein PD ho KHUNTO nia pozisaun. Opozisaun ka Koligasaun? Ita hotu hein atu rona husi sira bainhira sira enkontru hotu tiha iha loron hirak tuir mai, maibe buat ida ne’ebe diak liután atu ita hein mak: Governu foun ida ne’ebé ukun ho diak!!