KOMUNIDADE METIAUT NO KRISTU-REI LA ASESU BEE MOS

Komunidade Suku Metiaut no Aldeia Kristu-Rei durante semana ida ona la asesu bee moos. Tanba ne’e, komunidade sira tenki kuru bee ho distansia dook ba nesesidade lor-loron nian.

Ines Soares Bareto nu’udar komunidade Aldeia Karungu-Lau Area-Branca Suku Metiaut, Postu Administrativu Kristu-Rei, hateten, bee mos kontinua sai preokupasaun bo’ot ba komunidade sira.

“Durante semana ida ona ami la asesu bee moos. Durante ne’e ami  sosa bee galung hodi uza  hemu no tein, atu haris no fase roupa kuru bee iha Bidau ho motor,”hateten Ines Soares Barreto ba GMN iha Area-Branca Tersa (12/09).

Nia hatutan, durante ne’e  sira uza bee PAM,  maibé iha semana kotuk liu ba tékniku sira husi diresaun SAS nian, sobu tiha tornera diresaun Metiaut nian, no to’o agora seidauk monta.

“Tanki ne’e husik mamuk hela to’o agora durante semana ida ona, ami atu hetan bee  moos difisil tebes, ami uza bee mos hodi hemu, fase roupa no mós haris  ba kuru bee iha Bidau,”relata Ines.

Iha fatin hanesan, Estudante Sonia Soares, esklarese,  ema moris ne’e, presija liu mak bee. Tanba ne’e, kuandu laiha bee, laiha moris.

“Bee iha mak ita bele hemu no tein hahan, haris no seluk tan. Ami  iha ne’e durante semana ida nia laran, ami atu hemu no tein ba sosa bee galung,”katak nia.

Nia afirma,  Governu foun mai ne’e, tenki tau matan ba povu nia halerik liu-liu kona ba bee mos no seluk tan.

“Ne’e signifika Governu ukun kleur ona, maibé ukun seidauk diak. Tinan-tinan Governu aprova hele de’it orsamentu atu halo dezenvolvementu iha Timor-Leste, inklui atu responde nesesidade báziku povu nian hanesan estrda, eletresidade bee mos, maibé povu sei halerik bebeik kona ba bee mos,”katak Sonia.aba