Nivio Correia Lebre simu ordenasaun sai Amu lulik

Deaknu husi Filho de Caridade Canossiano, Nivio Correia Lebre, simu ordenasaun husi Bispu Dioseze Dili Dom. Virgilio do Carmo da Silva SDB, hodi sai nu’udar amu lulik.

“Vokasaun nu’udar graça maromak nian no nunka konsidera direitu ema nian, no felismente, la bele konsidera vokasaun hanesan  ema nia preokupasaun, hakarak deit fo hanoin ba ita vokasaun ne’e ho inisiativa maromak ninian, ne’ebé nia fihir sira ne’ebé nia hakarak” Lia hirak ne’e hato’o husi Bispu Dioçese Dili, Dom Virgílio do Carmo da Silva iha nia omilia iha misa solene, Sabadu (04/11/2017) iha Igreja Paroquia Imaculada da Conceição Catedral Dili.

Nune’e, Padre foun Nivio Correia Lebre, dehan, saida mak nia hetan la’os presesu badak, tanba iha preparasaun hahú husi nia etapa aspirante nian to’o vida saserdotal lori tinan 13 mak foin simu ordenasaun ne’e.

“Iha prosesu durante ne’e, ami barak mak tama iha seminariu, maibe ida ne’ebé to’o ikus sai ha’u Timor oan mesak hamutuk kolega Filipina nain 3, ida ne’e haree katak, la’os inisiativa ami nian husi maromak nia mizerikodia no domin tomak akompaña iha prosesu nia laran, hodi hili nia ba nafatin, hanesan nai lulik hodi servi ba kreda,”dehan Padre ne’e.

Padre ne’e afrima, durante ne’e klaru iha difikuldade ho dezafiu, maibe dezafiu sira ne’ebé akontese, hanesan momentu kresimentu ba sira, atu haree hodi servi.

“Hanesan iha ha’u nia lema hatete, folin laek ne’ebé maromak hili. Tamba ne’e, sentimentu ne’ebé iha ha’u nia fuan agora ne’e, nakonu ho fuan gratidaun nian, no agradese ba esforsu tomak familia no relijioza, no mós husi sarani sira, belun  sira ha’u fiar ho esfosru hirak ne’e, importante liu sustenta nai lulik ida iha nia moris mak vida orasaun, ba amululik hotu, atu saran a’an ba maromak hanesan instrumentu  ida ne’ebé, lori sarani ba moris diak, no hakmatek tuir maromak nia hakarak,”akrsenta Padre Nivio.

Alende ne’e familia, Pedro da Silva Correia Lebre hanesan aman husi Padre Nivio Correia, senti kontenti, tamba iha ona ida ne’ebé sai padre.

“Iha familia ida ne’e, foin primeira vez, ami oan sai nu’udar padre. Tamba ne’e hanesan alegria bo’ot ida mai ami,”afirma Pedro.Oly