Dom Basílio husu povu hotu tenki ba vota

Núnsiu apostóliku no Bispo dioseze Baucau, Dom Basílio do Nascimento husu povu tomak tenki ba vota iha eleisaun antisipada loron 12 fulan Maiu Sábado semana ne’e.

Bispo Dioseze Baucau Basílio do Nascimento hato’o mensazen ne’e, hafoin remata renova akordu entre Governu ho uma kreda iha Palasiu Governu, Kinta (10/05/2018).

Tanba ne’e, tuir Dom Basílio katak, bainhira sidadaun ida lakoi ba vota, labele ejiji nia direitu ba Estadu.

“Hanesan sidadaun nia la ezerse nia responsabilidade, nia la kontribui ba nasaun nia vida, ne’e duni bainhira Governu forma ona mos hirak ne’ebe la mai vota labele mai mangame dehan Estado tenki mai haree ami hanesan ne’e, tanba sira la halo sira nia obrigasaun,” apela Dom Basílio do Nascimento.

Ne’e duni Bispo Basilio do Nascimento afirma, dia 12 de maiu loron importante tebes, atu sidadaun hotu iha obrigasaun atu vota hodi bele kontribui ba páz no estabilidade nasaun nian.

Nune’e mos Dom Basílio argumenta, durante tinan ukun nain sira mak manda povu, maibe durante loron ida povu maka sei manda fali ukun nain sira liu husi loron eleisaun.

“Iha loron ida ne’e povu nia surat oan ne’e importante, ne’e duni votu ne’e obrigatóriu hanesan sidadaun, tanba se mak la vota depois keta mai husu ba Estadu atu sisti nia direitu no dever,” dehan Bispo Basílio. mia